DEFENDE O MONTE PITUCO (Pornedo)

Tralas mocións, seguiron varios puntos sobre a actividade de control do Pleno:

4.- Posta en coñecemento do Pleno da Corporación das resolucións ditadas no mes de decembro de 2014.
5.- Posta en coñecemento do Pleno da Corporación do informe de Intervención relativo á información sobre as resolucións da Alcaldía contrarias aos reparos dos meses de novembro e decembro de 2014.
6.- Posta en coñecemento do Pleno da Corporación da resolución do Tribunal Administrativo Central de Recursos Contractuales, do 18.12.2014, pola que se declara a inadmisión do recurso administrativo especial en materia de contratación interposto pola empresa “Procedimientos de Aseo Urbano, S.A.”, contra o acordo de adxudicación, de 10.10.2014, do contrato do “Servizo de Limpeza de edificios e instalacións dependentes do Concello de Marín” e se acorda levantar a suspensión do procedemento de contratación.
7.- Posta en coñecemento do Pleno da Corporación da Memoria Anual do CIM do ano 2014.
8.- Posta en coñecemento do Pleno da Corporación da Sentenza firme, ditada o 19.06.2014 pola Sala do Contencioso-administrativo do T.S.X. de Galicia, que desestima o recurso contencioso-administrativo interposto por Dª. Marta e D. Manuel Dios Touriño contra a Orde da Consellería de Medio Ambiente, Territorio e Infraestruturas, de 27.06.2012, de aprobación do PXOM do Concello de Marín.
9.- Posta en coñecemento do Pleno da Corporación da Sentenza firme, ditada o 10.07.2014 pola Sala do Contencioso-administrativo do T.S.X. de Galicia, que desestima o recurso contencioso-administrativo interposto por D. Antonio Alberto Calvar Carballo-Pérez, contra a Orde da Consellería de Medio Ambiente, Territorio e Infraestruturas, de 27.06.2012, de aprobación do PXOM do Concello de Marín.
10.- Posta en coñecemento do Pleno da Corporación da Sentencia, ditada o 20.03.2014, pola Sala do Contencioso-administrativo do T.S.X. de Galicia, recorrida en casación, que desestima o recurso contencioso-administrativo interposto por Dª. Mª del Pilar García Iglesias contra a Orde da Consellería de Medio Ambiente, Territorio e Infraestruturas, de 27.06.2012, de aprobación do PXOM do Concello de Marín.
11.- Posta en coñecemento do Pleno da Corporación da Sentencia, ditada o 10.07.2014, pola Sala do Contencioso-administrativo do T.S.X. de Galicia, recorrida en casación, que estima parcialmente o recurso contencioso-administrativo interposto pola empresa “Vodafone España, S.A.” contra a Orde da Consellería de Medio Ambiente, Territorio e Infraestruturas, de 27.06.2012, de aprobación do PXOM do Concello de Marín.
12.- Posta en coñecemento do Pleno da Corporación da Sentencia, ditada o 04.12.2014, pola Sala do Contencioso-administrativo do T.S.X. de Galicia, susceptible de recurso de casación, que estima parcialmente o recurso contencioso-administrativo interposto pola empresa “Telefónica Móviles España, S.A.U.” contra a Orde da Consellería de Medio Ambiente, Territorio e Infraestruturas, de 27.06.2012, de aprobación do PXOM do Concello de Marín.

Na recta final da sesión, abriuse un turno de palabra para formular rogos e preguntas:

-Francisco Veiga: interesouse polo caso da empresa de limpeza referido no punto 6, en previsión de que “las trabajadoras de la empresa de limpieza de las instalaciones municipales tengan el mismo problema que las de Cleanet”.

-María Ramallo: explicou que Eulen é a empresa á que se lle adxudicou o servizo directamente, que cumpre o prego de condicións, que a partir do día 15 prevese a sinatura do contrato e que as traballadoras serán subrogadas.

-Muradas: non faltaron os seus clásicos (as obras en Ezequiel Massoni), coa novidade de que nesta ocasión decidiu “transformar os rogos en preguntas”, que todas comezaron co adverbio “cuándo”. Así, preguntou pola sinalización nas zonas peonís, a instalación de sinais luminosas nos pasos de peóns, as tapas das alcantarillas na Banda do río… Ademais, preguntou se houbera algunha denuncia pola megafonía que soara durante o fin de semana a bordo dun vehículo que percorreu todo Marín facendo publicidade dun negocio. Rematou falando dun socavón “bastante preocupante” no vial de praias.

-María Ramallo: Sobre Ezequiel Massoni, apuntou que non se fixo o informe pero que a obra estaba rematada, pendente de que o enxeñeiro dera o visto bo. “En comparación coa obra anterior, fixéronse máis acometidas”, asegurou a alcaldesa. Sobre as obras pendentes, puxo como razón que “no Nadal houbo persoal”. En canto á rúa Secundino Lorenzo e os problemas que houbera coa empresa Antalsis, á que o Concello lle gañou sete contenciosos, explicou que a obra está recepcionada pero que a reparación das eivas “non lle vai custar ao Concello” pola incautación da fianza. O socavón do vial de praias estaba “en estudo” e sobre a megafonía publicitaria, non lle constaba ningunha denuncia.

-Luz Santiago: preguntou se a licitación do servizo de atención a domicilio se coñecería antes de que rematara o mandato e pola memoria do antigo patronato de cultura.

-Con respecto ao primeiro tema, María Ramallo informouna que o comezara o trámite administrativo. E sobre o antigo patronato, que a concelleira de cultura informaría na próxima comisión.

-Carmen Villanueva: a raíz das obras de reforma nas rúas Almuinha e Jaime Janer, preguntou onde bailarían a Danza de Espadas. Santos Costa, que tamén é danzante, levantou a cella. “Se está privando de un espacio donde siempre se bailó, siendo una fiesta de interés turístico”, engadiu a concelleira socialista.

-Santos Costa contestou que “se tuvo en cuenta la ubicación de la danza en las obras”, de forma que os bolardos que se instalaron son “extraíbles” e os bancos “pódense mover”.

-Pilar Blanco: criticoulle á alcaldesa que non se convocara a xunta de voceiros para tratar unha solicitude rexistrada pola CIG sobre a recuperación do servizo de ambulancias; sobre o bar de Portocelo, criticou que unha obra que tiña ano e medio requerida recentemente traballos de impermeabilización na terraza por valor de 20.000 euros; tamén preguntou polo convenio coa Deputación para a recollida de cans abandonados, que custa 0,30 céntimos por habitante, o que supón 7.500 euros, e aínda así, o pago que se lle fixera á Deputación superaba os 10.000, polo que lle solicitou a documentación que acredita ese pago; por último, preguntou polo posicionamento do Concello a respecto da planta de compostaxe proxectada polo Concello de Pontevedra en A Canicouva e esixiulle á alcaldesa que leve ao Pleno a moción proposta polo BNG marinense.

-María Ramallo: sobre o servizo de transporte sanitario, emprazou o Bng e a CIG e fixar unha data para a reunión e afirmou que dende o Concello “vaise seguir facendo forza”; en canto ao bar, xustificou as obras de impermeabilización para evitar humidades na zona dos baños e do almacén; sobre a factura polo servizo de recollida de animais, contestaría por escrito; a construcción da planta de compostaxe, segundo a alcaldesa, “non se vai facer por agora” porque o proceso de licitación para abaratar a recollida de lixo quedara deserto e amosouse partidaria de “apoiar” a adhesión do Concello a esa planta de tratamento de lixo.

-X.M. Vilaboa: a traca de rogos e preguntas comezou pola pista do pabellón do Sequelo e pola factura pendente de 5.700 euros; máis facturas: outra de 20.000 pola escaleira de madeira en Ezequiel Massoni, outra de 14.250 euros para unha empresa de Cambados pola ampliación do Camiño de Aguete, do que insinuou que remataba diante da casa do concelleiro de Medio Rural; outra de 6.000 euros para unha empresa de Marín por obras de abastecemento de auga; outra de 8150 euroos pola explotación do servizo municipal de auga, do que criticou que o Goberno local “oculta o procedemento”; e outra máis de 21.175 euros polo estudo da alternativa da mellora hidráulica do río Lameira, do que tamén denunciou que “se ocultou información” relacionada coa expropiación de fincas e o derrubo de construccións no marco do proxecto “virtual” do centro de saúde. Vilaboa tamén criticou que en vez de poñer en marcha o plan de emprego aprobado no pleno e “consensuado por todos”, se tardaran “10 meses en facer un trámite”. “Igual ten moito traballo; pasea coa tuna”, espetoulle Vilaboa a Santos Costa.

-O concelleiro de Urbanismo respostou que as primeiras medidas que se tomaran na pista do Sequelo eran para “axustarse á subvención da Deputación”; da escaleira, que non hai proxecto; do camiño de Aguete, que non chega ata a casa do concelleiro; e sobre o servizo de augas, “no se oculta nada”.

-María Ramallo continuou nesa liña de negar a ocultación de información sobre o proxecto do centro de saúde, argumentando a existencia dun documento de Augas de Galicia que indica que “esa parcela está afectada” en materia hidráulica; en canto ao plan de emprego, anunciou que “se vai pasar á contratación dos peóns seleccionados”.

-Esther Crespo: pediu “respecto pola nosa lingua” ante a utilización de topónimos castelanizados na publicidade dun acto navideño en “Seijo”; que se eliminen as pintadas fascistas que non foron aínda borradas; e que hai unha farola preto da ponte do Valado, en San Xulián, co cableado ao aire.

-Isabel Martínez Epifanio: ante o próximo cambio no sistema de megafonía do salón de plenos, pediu que se instalen nos bancos enchufes e portos USB para que os concelleiros puideran ter acceso ás novas tecnoloxías durante o pleno; tamén preguntou canto custaran a Cabalgata de Reis, os caramelos, que asociacións colaboraran e a cuantía coa que foran subvencionadas; ademais, apuntou que no bar de Portocelo non hai datáfono nin calefacción.

-María Ramallo: sobre os custes da Cabalgata, informaríaselle na comisión de Facenda, así como dos detalles referentes ás entidades colaboradoras (Trompos os pés, Ateneo Santa Cecilia, Banda de Cornetas, Anxuíña, Os Chaneiros) e os gastos na animación; en canto a Portocelo, explicou que esta instalación municipal tiña o obxectivo de “prestar apoio ao servizo de praia” e que coa reforma que se fixera quedara “mellor de como estaba”, independentemente de que “poderíase investir máis”.

Así rematou o pleno pero, cando ía levantarse a sesión, ergueuse entre o público (as traballadoras de Cleanet e os do 061 xa marcharan logo da intervención de Pilar Blanco) unha veciña que ten protagonizado unha longa movilización ante o Concello de Marín e os Xulgados de Pontevedra: Pilar García Iglesias, da que neste pleno se informou da desestimación dunha demanda presentada contra o PXOM.

A alcaldesa e os demais membros da Corporación quedaron escoitando as súas queixas, sobre os 8 anos que leva (primeiro durante a etapa do bipartito e agora gobernando o PP) en situación precaria vivindo nunha casa que, segundo afirmou, é “legalizable”. Complexa situación a desta veciña, que lle botou valor para protestar ante os concelleiros pola “inxustiza” que se viña cometendo con ela e a “persecución” da que se sentía vítima. María Ramallo emprazouna a acudir ao Concello para que os técnicos municipais lle plantexaran o seu caso.

No pleno deste mes tamén se debateu unha moción urxente do Bng sobre a situación das traballadoras de Cleanet, a empresa adxudicataria do servizo de limpeza das instalacións do Ministerio de Defensa que, no caso de Marín e Pontevedra, son a Escola Naval, a Brilat, o complexo deportivo e a residencia militar de Campolongo, e a delegación de Defensa. Acumulan xa varios meses sen cobrar e, ademais de concentrarse diante dos seus centros de traballo en varias ocasións, esta semana van levar as súas protestas ata o Ministerio de Defensa en Madrid, co apoio da CIG e do Bng.

A moción defendida por Pilar Blanco instaba a alcaldesa a dirixirse ao Ministerio para que Cleanet pague as nóminas pendentes, así como instar o Ministerio a rescindir o contrato con esta empresa. As traballadoras e os seus representantes sindicais asistían ao pleno portando a pancarta que lucen nas súas concentracións; Pilar Blanco referiuse a elas como un “exemplo de dignidade” por defender os seus dereitos laborais. Nas súas críticas a Cleanet, a voceira do Bng resaltou que “desde que se lle deu a concesión, a empresa empezou xa a incumprir o contrato e a encadear retrasos no pagamento dos salarios”. Mais tamén censurou o Ministerio de Defensa por darlle o contrato a unha empresa que ofreceu unhas condicións económicas que raiaban a “baixa temeraria”.

A raíz dunha pregunta formulada pola deputada do Bng no Congreso a propósito deste conflicto, Pilar Blanco afirmou que “a Defensa só lle importa que as traballadoras e sigan limpando” e acusou os seus responsables de “desentenderse e deixar que pase o tempo ata que remate o contrato”. Dende o Bng criticaron o “atraco” por parte da empresa e a “máxima insensibilidade” do Ministerio, “que solo argumenta que lle sigue pagando a Cleanet”.

María Ramallo contestou que o grupo municipal do PP apoiaría a moción e falou dunhas “xestións” segundo as cales “entre finais de xaneiro e principios de febreiro vaise rescindir o contrato con Cleanet”.

Detalle importante: foi un instante nada máis, pero na sala de plenos escoitouse un amago de aplauso entre as traballadoras; un aplauso ‘interruptus’, afogado polas circunstancias da protesta simbólica que realizaban coa súa presenza no Concello.

Continuou María Ramallo apuntando que “en abril estarán contratados os servizos cunha nova empresa”. Esta afirmación tivo resposta por parte do grupo de traballadoras e sindicalistas: “E mentres quen vai cobrar?”.

A alcaldesa explicou que “hai que cumprir os prazos para sacar o servizo a concurso” para non comprometer o proceso de contratación e falou de “facer máis forza para que non se alongue esta situación”, da que lamentou que “somos reféns destas problemáticas” que, no caso de Cleanet, é unha empresa “de Barcelona, con 1.000 empregados e moitos clientes”.

“…E amigos do PP!”. Quen soltou esta couce foi Xabier Aboi, pedra angular da CIG en Pontevedra e no Morrazo. “Vostede tamén ten os seus amigos”, replicoulle María Ramallo. “Levan tres meses sen cobrar e ti cobras”, volveu retrucar Aboi, con ganas de non soltar o fío da polémica dialéctica. María Ramallo tratou de buscar o gancho político, polo feito de que a moción e o apoio que ían obter en Marín debería reproducirse tamén nos concellos de Pontevedra e de Ferrol, que tamén contan con instalacións de Defensa. Pero falou de máis cando emprazou as traballadoras a acudir ao Xulgado do Social para reclamar os salarios que lle debía Cleanet, tendo en conta a precaria situación económica na que poden atoparse ao ver as súas economías mermadas. “O que interesa é que movades o cu, non que apoiedes unha moción”, rematou Aboi.

No turno do Psoe, Francisco Veiga solidarizouse coas traballadoras e indicou que agardaba “un apoyo más contundente” por parte do PP a esta moción, tendo en conta a situación: “cuatro meses sin cobrar y yendo a trabajar igual para mantener sus derechos y su puesto de trabajo”, expuxo Veiga. Criticou o “trato pésimo” da empresa e que “la Escuela Naval no se quiso reunir con ellas”.

Veiga pretendía sacar vantaxe da situación e empezou a ‘emocionarse’ con propostas que rozaban a demagoxia: “Vamos a mandar esa carta para solo quedar con la conciencia tranquila? Vamos a poner una pancarta en el Ayuntamiento, a reclamar que la Escuela Naval se reúna con las trabajadoras”, dixo o voceiro socialista, que tamén se referiu ás dificultades destas persoas para pagar os impostos municipais en ausencia dun salario cada mes. “Con esa carta no me vale, con rescindir el contrato no me vale”, insistía Veiga. “Llegamos tarde, ya teníamos que estar hablando con el delegado del Gobierno y el delegado de Defensa”, concluíu Veiga, que debe ter sobradamente controladas as medidas do balcón da Casa Consistorial.

Isabel Martínez Epifanio comezou a súa intervención dicindo “que bonito é facer demagoxia”. Non se refería directamente a Veiga, pero se el seguise gobernando o mesmo se lle podería criticar a María Ramallo que a Francisco Veiga, mesmo que a Pilar Blanco. O sillón da Alcaldía e a bancada do Goberno local imprimen ‘carácter’.

“Faremos o que poidamos na medidas das nosas posibilidades? Non!”, exclamou a voceira de Mar-In, parafraseando unhas palabras anteriores de María Ramallo. “Eu son oposición, pero vostedes son 12, do PP, teñen relación coa Escola Naval e co Goberno Central”, reprochoulles aos populares. “A moción do Bng é bastante suave”, engadiu Isabel Martínez Epifanio.

Na segunda ronda, Pilar Blanco cuestionou as explicacións de María Ramallo apelando a “cumplir as leis”, ao que a voceira nacionalista respostou: “Eu de leis non entendo e moitas cuestiónoas. Non nos veña con ese tema legal; o Ministerio está en posición de facer máis”.

…Muller, así é como nesta sociedade estamos ata as orellas de corrupción política, imputacións e irregularidades, de todas as formas e colores.

Pilar Blanco arriscou máis, acusando a Cleanet de que “levou o concurso daquela maneira” ante a connivencia de Defensa, que “non se preocupou de comprobar que fose unha empresa solvente”. Tamén emprazou a María Ramallo a “levantar o teléfono para que Rajoy garanta que reciban as traballadoras cando vaian a Madrid”. Ademais, reprochoulle ao PP que “ningún deputado popular de Pontevedra preguntara por ese tema”, en alusión a Telmo Martín, por exemplo, ou a propia ministra Ana Pastor.

No seu novo turno, María Ramallo volveu reiterar o apoio do seu grupo “con campaña electoral ou sen campaña electoral” e aclarou que “a responsabilidade do Concello é limitada” neste caso, malia o cal a alcaldesa insistiu en que fixo “xestións con Defensa”, argumentando que o órgano de contratación é o Ministerio, non a Escola Naval nin a Brilat. “A normativa é a que é”, recalcoulle a alcaldesa á oposición e ás traballadoras interesadas.

“…Que cambiastes vós!”, volveu espicharlle Xabier Aboi co seu vozarrón, referíndose á reforma laboral. “As traballadoras non se dirixiron a este Goberno local”, terciou a alcaldesa, que seguiu aclarando que o propio Concello non foi alleo a este tipo de conflictos con outras empresas e os seus traballadores. “Hai que informar as traballadoras do que hai”, advertiu María Ramallo, insinuando que tal vez a CIG e o Bng estiveran creando expectativas demasiado optimistas.

“…O que queren é cobrar!”. Nesta ocasión foi Xosé María Vilaboa o que tomou a palabra. A alcaldesa chamouno á orde.

Aquí todos tiñan máis que dicir.

Francisco Veiga instou a alcaldesa a “pensar lo que ha dicho”, poñendo como exemplo que “tampoco es trabajo de la Xunta ir a México a buscar floteles para Barreras”, e equiparando as traballadoras de Cleanet cos de Factoría Naval, polos que a Corporación marinense “también peleó por ellos” cando o asteleiro atravesaba dificultades. E referiuse á Escola Naval como “el responsable” da situación das traballadoras porque “son las personas con quien tratan y son su órgano directo”.

Isabel Martínez Epifanio expuxo que para chegar ata o Ministerio de Defensa en Madrid “teñen que ir con alguén”, por iso xustificou que a Escola Naval debería recibir as traballadoras. E fixo un inciso para criticar a reforma laboral feita polo Goberno “co apoio de UGT e de CCOO para escravizarnos máis, permitir despedimentos de balde e recurtar salarios, así que non veña intentar confundirme nin me veña dar leccións”, champoulle a concelleira de Mar-In, case sen tomar aire, de tanto ‘salero’ que lle botou…

Foi a única concelleira aplaudida polas súas palabras. Chimpún!

Pilar Blanco pechou as intervencións sen máis novidade que lembrarlle a María Ramallo que a moción “a insta a vostede”.

Na votación, os edís de todos os grupos votaron a favor da moción, que foi aprobada entón por unanimidade.

O pleno do pasado venres comezou cun minuto de silencio pola morte do marinense Manuel Mesías Barros, o ciclista que fora atropelado pola tarde na autovía.

No comezo da orde do día planteouse unha moción do PSOE solicitándolle ao Concello que lle traslade á Xunta a proposta para que se restitúa o servizo de Noitebús entre Marín e Pontevedra. Luz Santiago expuxo que con esta medida diminuirían os accidentes de tráfico e instou o Goberno autonómico a “asumir sus responsabilidades” recuperando esta liña de transporte, que tamén funciona noutras localidades como Santiago, A Coruña ou Lugo. “Si no aprueban la moción, les proponemos tratar estos puntos en comisión”, terciou a edil socialista.

O concelleiro de Tráfico replicoulle que na comisión informativa o PP xa se amosara partidario de “mejorar los horarios de bus, intensificar los servicios, hablar con los responsables de la empresa y que éstos a su vez pudiesen dialogar también con los portavoces municipales, además de apoyar la implantación del área metropolitana de transporte”. Sen embargo, Estévez Salazar desviou o sentido da moción do PSOE apuntando o exemplo da localidade de Melide, “que volvió a poner el Noitebús, pero a instancias de los empresarios de hostelería”. En definitiva, o grupo municipal do PP poñía como condición para aprobar a moción que se retirase o punto fundamental: o traslado á Xunta da petición para que se repuxera o Noitebús entre Marín e Pontevedra.

Por parte do BNG, Pilar Blanco comentou ironicamente que a réplica a esta moción tiña que facela o presidente de Nuevas Generaciones, o edil Pablo Novas, argumentando que o posicionamento de NNGG era “distinta” da exposta por Estévez Salazar: “Pasaron de esixirlle ao bipartito da Xunta que mellorara o Noitebús, a dicir que vai botar en contra dunha moción que propón que se estude a posibilidade de retomar o servizo”. O partido que estea libre de contradicións, que tire a primeira pedra… agás o de Pilar Blanco que, debe ser como ese deterxente que lava máis branco que ningún… “Menos hipocresía e máis vivir na realidade de gobernar a favor da xente e da xente nova”. Olé!

Dende Marinenses Independentes, Isabel Martínez Epifanio lamentou a “pobreza intelectual” da intervención de Estévez Salazar e criticou as alusións deste a propósito da cantidade de mozos e mozas que saen en Marín o fin de semana. “En canto valora vostede a seguridade? Prefire que vaian cinco nun coche, que igual o condutor teña bebido alcohol, en vez de que poidan utilizar un servizo público?”. A concelleira independente foi moi crítica co servizo de Mombús e coa xestión do edil de Tráfico: “O que conseguiu en tres anos foi que Mombús colocara os horarios dos buses nas marquesinas”. Tamén lle pediu a Estévez Salazar que “reconsidere o seu posicion contraamento porque ninguén está libre dun accidente e do que se trata é de facer un servizo social”. A fin de contas, “non se lle estaba pedindo nada do outro mundo”, sen contar con que o prezo do billete Marín-Pontevedra (1,40€) parécelle “carísimo”.

Mentres Isabel Martínez Epifanio se explicaba, o seu discurso parecía non interesarlle moito a Xosé María Vilaboa, do BNG, que estaba máis ocupado facendo fotos co seu móbil das traballadoras de Cleanet e dos militantes da CIG que as acompañaban, que estaban no salón de Plenos para asistir ao debate dunha moción posterior…

No segundo turno, Luz Santiago queixouse de que o concelleiro popular “no dijo nada de los hosteleros” e reiteroulle que “no es un servicio de ocio, sino de seguridad”, polo que defendeu o seu carácter público. Do contrario, “es como si las farmacias montasen los centros de salud”, engadiu.

Continuou Estévez Salazar defendéndose: “Yo nunca he hablado de fomentar el botellón”. E afirmando: “La Xunta subvencionaba el servicio”. E metendo a zoca: “Ojalá se pudiera conseguir que la juventud se quede en Marín”. Para que diaños están cobrando entón, se non é para que se implanten medidas para promocionar a hostelería, a oferta de lecer e os servizos orientados á xente nova?

Pilar Blanco volveu cargar contra Estévez Salazar. Entretanto, Xabier Aboy e Iria Aboy rían del e comentaban polo ‘bajini’… Continuaba a voceira do Bloque insistindo que o Noitebús “é rentable porque evita que a xente nova ande pola estrada, beba ou non beba”. E sacoulle punta ao patinazo do edil popular: “Xa é hora de que faga algo para que a xente nova quede aquí. Quédanlle tres meses”, comentou Pilar Blanco ante a inminencia das eleccións municipais de maio, recriminándolle tamén que “en tres anos non fixo absolutamente nada polo servizo público de autobús”.

Isabel Martínez Epifanio volveu mallar en Estévez Salazar, que non tivo o seu mellor día, se é que tivo algún día bo nos plenos nos que interviu. “Vainos facer crer que a Xunta non instalou o servizo? Que Mombús facía o servizo amablemente?”, ironizou. “A Xunta deulle a concesión á empresa que ten o monopolio neste país: Mombús, que se dedicou a roubar cartos públicos porque cobraba e non facía nada”. As acusacións da concelleira independente ían ‘in crescendo’; o concelleiro do PP debía estar suando a gota gorda e, como se soe dicir en termos futbolísticos, pedindo a hora. Martínez Epifanio comíalle as papas na cabeza: “Tería que ter feito algo coa concelleira de Turismo para que os mozos queden en Marín… Fale con Melide, e que veña Melide a poñernos o Noitebús. Canto vale unha vida humana?”, concluíu.

…Que mágoa que Isabel Martínez Epifanio non teña intención de repetir candidatura nas próximas eleccións. Que alguén a convenza! Sen ela, o nivel do pleno vai caer moitos puntos; tantos como perdeu cando tamén quedamos sen a figura do seu compañeiro de partido, Miguel Suárez Briones.

Rematou a defensa da moción a concelleira socialista: “Esto no tiene que ser un negocio. Se ahora en sanidad, por lo que supone un accidente”.

Na votación, a moción foi rexeitada: a favor estiveron PSOE, BNG e Mar-In; en contra, o PP.