Achegarse dende o fondo do camiño ao conxunto rupestre do Pornedo vendo na distancia que unha cinta rodea o xacemento, fai pensar no peor: “xa o desgraciaron”, “pasáronlle por riba con algunha máquina”, “pintárono”… mil e unha cafradas amoréanse na cabeza mentres nos imos achegando onda os petróglifos. Algo semellante sucedera xa cando a Comunidade de Montes de San Xulián realizou o último desbroce nesta zona en outubro de 2016, e -por unha cuarta!- os gravados salváronse de ser triturados polas cadeas.
Por sorte, descubrimos que nesta ocasión nada malo pasou, de momento; mais balizados están, por algunha razón. E coñecendo o percal, cabería intuír que vai suceder tres cuartos do mesmo que no petróglifo d’O Ciclista…
…que pode ser que retiren vexetación fóra do perímetro, pero que deixen a herba, os fentos e o toxo a carón mesmo do xacemento, como nun paradóxico trasunto do mundo ao revés; en vez de limpar o Ben de Interese Cultural catalogado que cómpre coidar e protexer, que limpen por fóra del.
Pronto sairemos de dúbidas. E contarémolo aquí, na bitácora do Monte Pituco (Pornedo). Dende 2009 informando, reivindicando e defendendo o ‘balcón da ría’.
DEFENDE O MONTE PITUCO (Pornedo) 
Deixar unha resposta