DEFENDE O MONTE PITUCO (Pornedo)

Esta semana fomos informados dun novo verquido na pista forestal do Monte Pornedo. O enésimo. E aínda que non caia nin gota, chove sobre mollado. A irresponsabilidade, a cara-dura, a torpeza, a insolidariedade… en definitiva, a mala educación volve cebarse novamente nun espazo comunal, de TOD@S.

Por fortuna son cada vez menos e prodúcense de xeito puntual, pero non deixan de amolar, de disgustar fondamente a quen traballamos a prol da defensa do monte e da natureza. 

Por iso cómpre volver facer un chamamento á sensibilidade da veciñanza que valora e apreza o monte para que, se detectan calquera ‘movemento’ sospeitoso llo notifiquen á Comunidade de Montes, ao Concello ou ao Seprona; para que denuncien feitos lamentables que emporcan e contaminan o noso territorio; para que o monte comunal sexa visitado e paseado, porque un monte ‘habitado’ é un monte protexido, a presenza da xente é o mellor efecto disuasorio para que lle bota o ollo ao Monte Pornedo ou a calquera outro para cometer estas tropelías.

Pola contra, un monte abandonado e solitario é un obxectivo fácil para quen precisa desfacerse de lixo, restos de obra, rodas vellas ou calquera outro material de refugallo sen dignarse en acudir a un punto limpo.

Dende a Asociación Monte Pituco (Pornedo) insistimos na queixa formulada a finais de 2017 con motivo da aparición dun verquido de portas vellas que aínda seguen tiradas na beira da pista forestal.

Por non falar da porcallada ciscada a carón do túnel da Variante de Marín entre A Pena e O Caeiro, que aínda ha botar raíces dende que foi localizada o pasado verán.