DEFENDE O MONTE PITUCO (Pornedo)

Fai como Iván:

busca o amor nos ollos

doces dun can.

Un ‘poema viaxeiro’ chegou ao Miradoiro do Pornedo, o ‘balcón da ría’, neste Día das Letras Galegas dedicado á profesora e escritora María Victoria Moreno.

Nenas e nenos da Escola de Educación Infantil Nosa Señora do Carme, de Marín, ceibaron textos da autora homenaxeada en diversos puntos da vila. Seguindo as instruccións que figuran no reverso do poema, gozamos da súa lectura e logo achegámonos ata o Monte Pituco (Pornedo) para que as palabras se enchouparan das cores do solpor. Agora, estes versos emprenden un novo tránsito para chegar -ogallá- a outras mans que os aprecien e sigan contribuíndo a que a literatura, a educación e a cultura flúan entre a veciñanza.

Grazas ao profesorado, o alumnado e a asociación de nais e pais da EEI Nosa Señora do Carme por poñer en marcha esta fermosa iniciativa. Grazas á pequena  Alexandra polos debuxos que acompañan a historia de Iván.

“Escribo en galego porque amo Galiza, porque Galiza me deu moito, porque penso en galego”

María Victoria Moreno