DEFENDE O MONTE PITUCO (Pornedo)

POR FIN!

POR FIN!

POR FIN!

…Tantísimo tempo agardando a que Deputación, Concello, a Santa Compaña ou quen fose se dignase a adecentar as beiravías en San Xulián e POR FIN esta semana a máquina desbrozadora pasou por esta estrada e deixou algo máis transitable o minúsculo espazo que ten para desprazarse a poboación da Pena, do Caeiro ou calquera dos moitos veciños/as que veñen camiñar por esta contorna.

Se xa as condicións de seguridade vial son perigosas, posto que os vehículos pasan moi pegados aos viandantes, e por riba estamos nun vial cun trazado moi sinuoso, con moitas curvas, e polo que os condutores adoitan conducir a unha velocidade superior á recomendable, o volume da vexetación -fentos, silvas e acacias con pinchos- que se vai acumulando complica aínda máis a situación dos peóns; xente que maioritariamente é de idade avanzada.

Por iso cómpre que os responsables municipais e provinciais estean máis pendentes das necesidades dos habitantes do rural que carecemos de beirarrúas, de estradas humanizadas con baldosas, adoquíns, bancos e farolas. Que visiten máis as aldeas das parroquias, e que atendan con máis celeridade as queixas cando procede acometer a limpeza destes espazos.