Publicado por: MontePituco | 18/08/2011

O INFORME (POR FIN) DO SEPRONA

(AGORA: imaxe do Alto do Pornedo en xullo de 2011)

Velar polo monte require un esforzo continuado, a implicación do maior número posible de persoas. Desgrazadamente, o Monte Pornedo leva moito tempo sen contar co aprecio nin coa preocupación da actual directiva da Comunidade de Montes de San Xulián, polo que fomos un grupo de veciños os que decidimos tomar a iniciativa de reivindicar a posta en valor dos seus recursos ante as agresións presentes e futuras que lle afectan.

Así, denunciamos insistentemente a proliferación de verquidos incontrolados. Enfrontámonos con valor a un serio problema que levaba anos enquistado ante a inoperancia da Comunidade de Montes: a afluencia de pilotos que converteran o Alto do Pornedo nun circuito ilegal de motorismo, provocando a degradación do terreo. Interesámonos pola recuperación do patrimonio rupestre, participando no grupo de traballo que deseñou o proxecto de creación do Espazo Natural e Arqueolóxico dos Sete Camiños. Emprendemos unha batalla política, administrativa e social contra a pretensión do Concello de Marín de instalar un polígono industrial neste enclave que non reúne as condicións mínimas debido á orografía escarpada da zona e ao seu rango de protección ambiental.

E velaquí os froitos, modestos pero significativos, desa ardua tarefa. Conseguimos que a Comunidade de Montes instalara carteis prohibindo a presenza de lixo e a circulación de vehículos motorizados fóra das pistas autorizadas. A alcaldesa de Marín e tres dos seus concelleiros visitaron puntos do Monte Pornedo nos que endexamais estiveran para admirar, dunha parte, a riqueza paisaxística e arqueolóxica, e coñecer, doutra, as problemáticas que urxe ir resolvendo. Tamén tivemos noticias directas -en resposta aos nosos escritos- por parte de cargos públicos de primeiro nivel como o Conselleiro de Medio Ambiente, o director xeral do Instituto Galego de Vivenda e Solo, e o Valedor do Pobo. Esta pasada semana foi o xefe do servizo de Patrimonio Cultural da delegación territorial da Xunta en Pontevedra quen expresaba o seu interese na conservación dos gravados rupestres a instancias dun informe do Seprona, outra entidade que tamén vén dando mostras de actuación a prol da mellora do Monte Pornedo.

Nun informe ao que tivo acceso DEFENDE O MONTE PITUCO, o Seprona deixaba constancia de que, en aplicación da Lei de Montes, non está autorizada a circulación con vehículos a motor monte a través, o que provoca “danos na cuberta vexetal” do terreo. Así, antes de que a Comunidade de Montes acabara cedendo ás presións e optara por sinalizar a zona, o Seprona constatou que “a reincidencia do tránsito de vehículos a motor” xenerara no Alto do Pornedo “unha especie de circuito moi frecuentado”, a “escasos metros” do cal se atopan os petroglifos do complexo rupestre homónimo.

“Dita actividade é totalmente incompatible coa conservación de dito complexo rupestre, que puidera verse afectado”, engadía o Seprona nese informe que lle foi remitido á delegación provincial da Consellería de Medio Ambiente e á delegación provincial de Patrimonio Histórico da Consellería de Cultura.

Dende entón, a actividade motorística diminuiu e o terreo comeza a recuperarse pouco a pouco. Onde ata hai ben pouco o terreo parecía ser propiedade unilateral das rodas e da velocidade, dun tempo a esta parte comezan a observarse sinais de actividade agrícola por parte dos comuneiros que acoden ao Alto do Pornedo para realizar tarefas tradicionais como a corta de toxo e fento para a alimentación do gando e o estrume das cortes. Para o aproveitamento silvícola e forestal, para o disfrute da natureza, e para admirar o legado milenario dos nosos antergos, ten que ser o Monte Pornedo. POLÍGONO NON!

(ANTES: imaxe do Alto do Pornedo en xaneiro de 2011)


Responses

  1. Parabens!

    • …A ver, a ver. Aí estamos, loitando duramente para “poñerlle as pilas” a este monte. Graciñas pola visita ao blog e por participar co teu comentario.

  2. […] -”O informe (por fin) do Seprona“. […]

  3. […] aos que houbo que facer fronte -mesmo aturando actitudes de mala educación e agresividade- foi a erradicación do circuíto de motorismo no que se convertera este val, literalmente ‘tomado’ por pilotos de motos e quads que, […]


Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s

Categorías

A %d blogueros les gusta esto: