Esta nube negra sobre o rural de Tomeza é o resultado dunha das moitas barricadas prendidas esta mañá polo persoal de Ence, unha empresa que, ademais de estar condenada por delicto ecolóxico continuado e de seguir contaminando a comarca de Pontevedra co seu impacto visual, cos seus cheiros e coas súas verteduras á ría, alenta a violencia e a polución na súa terca deriva agora que a Xustiza declarou ilegal a prórroga regalada polo PP de Mariano Rajoy.
En vez de esixirlle á dirección da fábrica o mantemento do emprego e da produción nunha ubicación alternativa, os traballadores atacan a cidadanía e o Goberno municipal, que o que fixo foi defender a legalidade, sendo avalada a súa actuación por unha sentenza que, non sendo firme, é abondo contundente.
Salvando todas as distancias, unha minoría dos habitantes da contorna do Monte Pornedo sabemos o que é ir contracorrente en aras da defensa do patrimonio, da natureza e da lexislación que os regulan; sabemos o que é demandar a unha Administración local e a unha poderosa Administración autonómica; sabemos o que é gañarlles con dictames inapelables; sabemos o que é aturar as insidiosas e covardes calumnias dos que ven prexudicados os seus intereses económicos e especulativos -disfrazados de demagóxicas promesas de prosperidade- cando ven esfumarse as posibilidades de construcción dun gorentoso polígono industrial; e sabemos da teima das Administracións por incumprir a súa obriga de acatar as sentenzas, algo do que tamén sabe moito a Plataforma en Defensa da Praza dos Praceres.
Por iso cómpre rebelarse contra o despropósito, a irracionalidade e contra esta campaña chunga de imitación da loita obreira ao estilo do sector naval vigués e ferrolán, que non ten nada que ver en fondo, forma nin lexitimidade co que promove Ence a través destas protestas cargadas de moita agresividade e pouca razón.
A carta aberta da Asociación Pola Defensa da Ría aos comités de empresa é ben elocuente: http://www.apdr.info/wp/2021/08/11/carta-aberta-da-apdr-aos-comites-de-empresa-de-ence
DEFENDE O MONTE PITUCO (Pornedo) 
Deixar unha resposta