25 de xullo pola tarde, incendio en Pardavila. Na parte inferior-esquerda da imaxe, obsérvase o camión da brigada de extinción dirixíndose ao punto onde se levanta a columna de fume.
Hai alguén empeñado/a en que o monte de Pardavila arda; e por extensión, porque para o lume non hai marcos nin fronteiras, que ardan tamén o monte de San Xulián, o monte do resto de Marín e os montes que rodean esta vila, tanto cara ao Morrazo como cara a Pontevedra.
Alguén aproveitou o 25 de xullo, xornada festiva e día grande de Galicia, para prender unha chama ou artellar algún mecanismo criminal co propósito de atentar contra o patrimonio natural e, como consecuencia, poñer en risco as vidas dos operarios das brigadas contra incendios e da veciñanza potencialmente afectada polas lapas. Ese alguén actuou pola tardiña, co día avanzado e con menos horas de luz por diante para dificultar os traballos de extinción.
Tamén cabe a posibilidade de que a columna de fume que se erguía nas proximidades do Castelo de Barbudo fose resultado dos rescoldos dun incendio que se produciu en días anteriores no mesmo lugar. Pero o certo é que, onde non ardeu e en ausencia de tormenta eléctrica, o lume non se produce por xeración espontánea, senón porque algo ou alguén o provoca.
Urxe investigación e vixiancia para evitar que alguén chegue a consumar o seu perverso propósito. Ogallá este ano os montes desta contorna non se acaben sumando ás negras estatísticas da devastación.
DEFENDE O MONTE PITUCO (Pornedo) 
Deixar unha resposta