DEFENDE O MONTE PITUCO (Pornedo)

Este 23 de abril, Día do Libro, ten un significado especial: o da liberdade, o da terra liberada das poutas da especulación e do neo-caciquismo. Durante os anos da loita incansable a prol da protección do Monte Pituco, os libros foron precisamente a fonte de coñecemento da que nutrimos a nosa modesta bagaxe sobre flora e fauna, patrimonio e cultura tradicional, colmando con información as nosas eivas en materias e saberes nos que eramos profanos. 

Mentres os pro-polígono conspiraban nas tabernas, nos camiños ou nos despachos, os valerosos defensores do Monte Pituco atopamos nas librarías, nas bibliotecas ou nos arquivos o soporte para cimentar o noso arduo traballo, que frutificou con dúas sentenzas firmes e irrevocables do TSXG; porque o mérito destes logros xudiciais non foi mera sorte nin casualidade: lemos para aprender, para razoar, para comparar, para argumentar, para verquer luz sobre a ignorancia e a incultura.

Aproveiten este Día do Libro para apoiar o comercio local mercando cando menos un libro -hainos a prezos moi asequibles-, coa vantaxe de favorecerse dos tradicionais descontos do 10% que se aplican nesta data. Estarán contribuíndo tamén a que o sector editorial siga producindo cultura, nun momento no que os recortes seguen facendo mella nesta industria. E se ademais consomen libros en galego, teñan a certeza de facer unha boa achega ao país, tan necesitado do compromiso da cidadanía para seguirmos construíndo unha sociedade forte e madura en termos identitarios. 

Porque en Galicia tamén se escribe e se reflexiona sobre ciencia, medio ambiente e diversidade; porque gozamos dunha natureza rica e singular. Porque hai pequenos colectivos e acreditados especialistas que teñen moito que seguir contando en termos de historia e antropoloxía. Porque hai ensaios ben interesantes e de doada asimilación para lectoras e lectores inexpertos, tanto de autores hispanos como estranxeiros, grazas ao labor dos tradutores e correctores; porque tampouco entendemos o avance intelectual sen a sensibilidade que nos proporciona a poesía.

E porque quizais nada do que levamos feito en Defende o Monte Pituco sería posible sen a perspectiva feminina, sen a inspiración das mulleres anónimas que nos precederon, queremos animar a ler a obra das autorAs. 

Fronte a quen desgrazadamente na nosa parroquia de San Xulián e no noso Concello de Marín segue desprezando, ninguneando, subestimando e coaccionando as mulleres e a súa capacidade para opinar, decidir e actuar, nada mellor que unha ‘vacina de letras’ contra ese machismo abafante e desprezable que aínda toca aturar.

No regato das Presas, a publicación dunha cooperativa editorial viguesa, de incipiente traxectoria

BIODIVERSIDADE: CARA A UNHA SEXTA EXTINCIÓN MASIVA, de R. Billé, P. Cury, M. Loreau, V. Maris e S. Huet (coord.); trad. Miguel Braña; limiar, Xosé Veiras (Catroventos Editora, 2017)

“…Aínda que este libro aborda a crise da biodiversidade a escala global e non inclúe ningunha referencia a Galicia, tamén fala da nosa terra. Porque, ao sermos parte do mundo desenvolvido, o impacto sobre a biodiversidade da nosa estrutura produtiva e do noso estilo de vida esténdese por todo o planeta. Como di a filósofa Virginie Maris, cómpre decatármonos de en que xeito os nosos modos de vida ameazan outras formas de vida, en lugares a miúdo moi distantes”. 

Na aba do Monte Pituco, onde poderiamos botarnos a rolos pola pendente do terreo

GUÍA DAS LIBÉLULAS DE GALICIA, de Miguel A. Fernández-Martínez (Baía Edicións, 2011)

“…As libélulas son dos poucos insectos considerados á hora de adoptar medidas de conservación en Europa. A súa conservación, como especies paraugas, implica a preservación das zonas húmidas onde se desenvolven, que teñen sufrido unha importante diminución nas últimas décadas”. 

Dunha editorial do Morrazo, unha obra sobre arte rupestre de Terra de Montes, a carón dos petróglifos marinenses do Pornedo

O LEGADO DOS HOMES PEQUENOS: GRAVADOS RUPESTRES DE CERDEDO, do Colectivo Capitán Gosende (Morgante Edicións, 2017)

“…Ninguén pode negar que o problema non resolto do despoboamento condena esta terra á orfandade, ligándoa a un futuro incerto e sometido a intereses espurios. Sen dúbida, pola súa vulnerabilidade, o acervo arqueolóxico será un dos grandes damnificados desta situación terminal. Capitán Gosende enorgullécese de figurar na nómina de asociacións e individualidades que, na Galiza, se botaron ao monte acirrados pola urxencia de dar a coñecer e protexer co coñecemento o que é patrimonio de todos”. 

Música para os sentidos, tamén a badaladas. Unha digna autoedición, como exemplo de que querer é poder

A LINGUAXE DAS CAMPÁS: ETNOGRAFÍA DOS SINOS, de Rosalía Rodríguez e Rafael Quintía (Asociación Cultural Os Chichisos, 2017)

“…A campá, en conclusión, é un símbolo de relación entre o ceo e a terra; tamén representa a chamada á oración e lembra a obediencia aos mandatos divinos. As campás simbolizan, ademais, a orde e a disciplina, pois son as que marcan o tempo de traballo. Tamén é frecuente en moitas culturas a idea de que a campá ten función expulsadora da desgraza, así como poder de exorcismo e purificación, polo que se usan como amuleto protector contra as potencias do mal ou para afastar as malas influencias”.

O monte non é un xardín, no sentido moderno da palabra, pero o Pituco é o noso paradisíaco ‘locus amoenus’

PEQUEÑOS PARAÍSOS: EL ESPÍRITU DE LOS JARDINES, de Mario Satz (Acantilado, 2017)

“…Si nos preguntaran cuál es el color más abundante en la tierra muchos diríamos que el azul, pues los viajes al espacio exterior han condicionado nuestra percepción hasta el punto que tendemos a ver nuestro planeta como una esfera envuelta en prodigiosos, glaucos, vibrantes océanos y mares. Aquí, sin embargo, a ras del horizonte y en nuestra casa terrestre, es el verde con sus diversos tonos y semitonos el color privilegiado que abruma nuestros sentidos al tiempo que estimula nuestros conos y bastones. Un ‘verde que te quiero verde’ que, como viera con alegría García Lorca, nos habla de un reposo y de una querencia, de frescura y de sombra”.

Edición bilingüe portugués-castelán. Luz, natureza e silenzo, feitos verso

EXPLICACIÓN DE LOS ÁRBOLES Y DE OTROS ANIMALES, de Daniel Faria; trad. Luis María Marina; ilustr. Christian Hugo Martín (Ediciones Sígueme, 2014)

“Como doem as árvores 

Quando vem a primavera

E os amigos que ainda estão de pé”.

Un libro -finalista do Premio Pulitzer de non ficción- que xa recomendamos en 2016

EN UN METRO DE BOSQUE: UN AÑO OBSERVANDO LA NATURALEZA, de David George Haskell; trad. Guillem Usandizaga (Turner Publicaciones, 2014)

“…Los productos madereros pueden ser mucho más sostenibles que otras alternativas como el acero, los ordenadores y el plástico, que consumen grandes cantidades de energía y productos naturales no renovables. El problema de la economía forestal moderna radica en la forma desequilibrada con que obtenemos madera de la tierra. Nuestras leyes y reglas económicas sitúan el beneficio a corto plazo de la extracción por encima del resto de valores. No tiene por qué ser así. Podemos volver a encontrar la senda de la gestión cuidadosa centrada en el bienestar a largo plazo tanto de los seres humanos como de  los bosques”.

Mulleres-toxo que ‘pinchan’, mulleres-chorima que ‘iluminan’. Agasallo da Marea Feminista de Marín pola participación no ciclo Loitadoras. Grazas!

DICIONARIO DE MULLERES GALEGAS, de Aurora Marco (Edicións A Nosa Terra, 2007)

“…A presenza de tantas féminas na historia de Galicia, máis ampla e de maior calado do que a simple vista semella, testemuña a loita das galegas que formaron parte activa da súa sociedade e do seu tempo. A historia non as puido borrar. Nesta altura en que a consecución dos nosos dereitos vai avanzando, amodiño, é importante saber de onde vimos, coñecer os nomes e a traxectoria das que nos precederon -xenealoxía feminina-, das que saltaron as barreiras de chumbo durante séculos, valorizar o seu traballo e, en definitivo, deitar luz sobre o noso pasado”.