Os ‘amig@s do balcón da ría’ somos afortunados de incorporar unha nova camarada na causa a prol da defensa do Monte Pituco (Pornedo). Peluda, orelluda e abofé que tamén áxil e inqueda, os seus ladridos sumaranse de agora en diante aos doutros fieis compañeiros de fatigas de homes e mulleres que pateamos estes lares coas nosas mascotas caninas.
Dámoslle a benvida a Yuna a este miradoiro privilexiado, a este histórico enclave cuxo pasado quedou gravado en pedra polos nosos ancestros. Seguros de que está nas mellores mans, nas xenerosas mans de dous bos coñecedores do Pituco e dos seus arredores, Yuna agradecerá moito os paseos entre estas arboredas, as carreiras pola pista forestal e a exploración da natureza en todos os seus recunchos.
Dende a Asociación Monte Pituco aproveitamos estas fermosas imaxes cedidas por Rita e Jose para darlle un novo pulo á campaña ‘Amig@s do balcón da ría’. Como se pode participar?
-Fai unha foto no miradoiro do Pornedo: a paisaxe, a flora ou a fauna da zona, os xacementos arqueolóxicos, unha autofoto, unha foto de grupo…
-Compártea en Facebook etiquetando a Salvador Pornedo ou Salvemos o Monte Pituco (Pornedo) e comentando o momento, recordo ou sensación asociada a esa imaxe.
-Visita o blog do Monte Pituco para ver a túa foto publicada.
DEFENDE O MONTE PITUCO (Pornedo) 
Deixar unha resposta