DEFENDE O MONTE PITUCO (Pornedo)

Benvido sexa o mes de maio, coas súas nubes, coas súas chuvias, coas súas flores cheas de colorido… Nós estreamos un novo xeito de celebrar o 1º de maio, enchendo de xestas a potiña de cerámica decorada cun dos motivos dos petroglifos do Pornedo, elaborada por Laura Villanueva no seu obradoiro Alén das Olas.

Un ano máis celebrouse en Marín a tradicional festa dos maios e, entre os catro maios e as tres embarcacións que este ano acudiron á convocatoria do Ateneo Santa Cecilia, non faltou o Maio de San Xulián.

Ao noso parecer, as súas coplas foron as mellores das que se cantaron neste certame: críticas, reivindicativas e cunha fonda aposta pola cultura, polo patrimonio e polo legado dos antepasados. Quedaron clasificados en 3ª posición no apartado de “letra”, pero dende o Monte Pituco (Pornedo) subscribímolas de principio a fin.

…Dicímolo con orgullo 

e con moito sentimento

DEFENDER SEMPRE O NOSO

ate o esgotamento…

Parabéns aos rapaces e rapazas do Maio de San Xulián, aos maiores que lles axudaron a confeccionar estas coplas tan ben acaídas, e a elaborar un maio tan xeitoso, que merecidamente gañou o 1º premio na categoría de coroa, ademais de quedar clasificado en 2º lugar nos apartados de construcción e interpretación.

Noraboa tamén aos demais participantes, os maios da Escola de Educación Infantil Nosa Señora do Carme, o Maio Landeiras de San Xulián, o Maio Mariñeiro do CEP Sequelo, e á flota de embarcacións formada polo Rampleiro San Xián dos Ancourados que tamén pertence á parroquia de San Xulián, o Polbeiro Xiana, e a Gamela Coruxeira da Asociación Cultural Amigos dos Rapaces.

…Viva a Festa dos Maios! Vivan as nosas tradicións e a nosa cultura!