Unha vez máis, defendendo e reivindicando a matogueira; un habitat sensible, necesario, importante para a conservación da biodiversidade, característico da nosa terra.
Este oasis de carrascos está preto da pista forestal do Monte Pituco, en terreo afectado polo polígono industrial que teñen proxectado o Concello de Marín e a Xunta de Galicia.
Aquí poderiamos pasar horas -horas!- procurando mantis, admirando a variedade de saltóns, sorteando arácnidos… Poderiamos parvear co espectáculo da ‘calluna vulgaris’ en flor, ir de mata en mata de ‘erica ciliaris’, apreciar o contrapunto amarelo do toxo ou tolear coa complexa identificación da diversidade de gramíneas…
Flora e fauna autóctona do Monte Pituco nunha ‘reserva’ que cómpre loitar por ir agrandando, gañando terreo ás especies invasoras. Non é tarde, cómpre tomar primeiro conciencia da importancia desta causa para logo ir dando pasos a prol da progresiva erradicación do eucalipto, ou da acacia, e a favor da reforestación con especies frondosas que lle proporcionen valor engadido ao monte, que reteñan a humidade da terra e do ambiente para termos un monte máis resistente ao terrible risco dos incendios.
Calluna vulgaris
Erica ciliaris e Cuscuta epithymum
DEFENDE O MONTE PITUCO (Pornedo) 
Deixar unha resposta