Publicado por: MontePituco | 09/05/2016

ACUAES: ASFALTADO DO VIAL DE SERVIZO

Vial de servizo da Variante no lugar de Caeiro.

Co asfaltado do vial de servizo da Variante ao seu paso polo lugar de Caeiro ponse fin, aparentemente, a un longo proceso iniciado coa exposición pública do proxecto de ACUAES para a instalación da nova rede de abastecemento de auga. Un proxecto ao que a Asociación MONTE PITUCO alegou ata en dúas ocasións para evitar dúas ameazas:

1ª) que non se instalara no Pituco un ramal das tubarías que quedase soterrado con vista a enganchar nel a hipotética instalación do polígono industrial proxectado no PXOM e no Plan Sectorial de Áreas Empresariais

2ª) que as máquinas non furasen no monte, evitando especialmente a afección na área na que foi soterrado un petroglifo pendente de catalogación durante as obras de construcción da Variante, nunha desafortunada actuación que contou co visto e prace da antiga dirección da Comunidade de Montes de San Xulián.

Tralas xestións realizadas, o primeiro obxectivo -aparentemente- quedou en parte logrado porque non se instalaron as tubarías previstas, senón que a hipotética conexión tería quedado nunha arqueta; o que non significa que se vaia levar a cabo. Esas foron as explicacións. Outra cousa é o que verdadeiramente teñan acometido os operarios seguindo as instruccións do proxecto.

Pero, por desgraza, non fomos quen de impedir o acceso das máquinas monte a través pola área do petroglifo desaparecido. Polo menos, houbo traballos de prospección arqueolóxica para garantir que o paso das tubarías non afectase en principio a ningún ben de interese histórico-cultural. Nesas catas quedou patente a composición rochosa do lugar ao aparecer penedo a pouca profundidade. Non en van, a esa altura, o topónimo da zona é “A Pena”.

Vial de servizo da Variante no lugar de Caeiro.

Subida pola pista de servido cara ao conxunto rupestre de Pinal de Caeiro.

Vial de servizo da Variante no lugar de Caeiro.

Dende a Asociación MONTE PITUCO, ao ter coñecemento de que se estaba a producir o asfaltado desta pista, contactouse inmediatamente por via telefónica cun directivo da Comunidade de Montes de San Xulián para que tivesen a ben supervisar a reposición deste vial nun punto tan sensible como o acceso ao conxunto rupestre de Pinal de Caeiro.

Este xacemento fora balizado con cinta e valado metálico dun xeito que requeriu a intervención correctora do Servizo Provincial de Patrimonio da Xunta, a instancias da Asociación MONTE PITUCO, que apreciou deficiencias na sinalización destes gravados. 

Unha vez que se tapou o burato aberto para a colocación da tubaría, o valado e a cinta foron retirados. Curiosamente, e de xeito un tanto imprudente, non se repuxo a sinalización ante a previsión da reposición do vial ao seu estado inicial. Tendo en conta o paso de maquinaria pesada e a manipulación de materiais potencialmente agresivos, como aglomerado, non tería estado de máis unha maior cautela; de aí a petición á Comunidade de Montes para que realizase o seguemento (do que non temos constancia directa de que se realizara, tralo aviso telefónico lanzado). 

Vial de servizo da Variante, diante do conxunto rupestre de Pinal de Caeiro.

A título informativo, a imaxe que figura a continuación foi tomada este pasado mes de febreiro. É o panel informativo que se instalou para sinalizar os petroglifos de Pinal de Caeiro, coñecidos como ‘O ciclista’, no marco das accións de posta en valor do Espazo Natural e Arqueolóxico dos Sete Camiños. 

Alguén que odia o patrimonio, que aborrece a quen loita pola difusión da historia e da cultura, alguén con nulo respeto polo ben común, alguén que despreza os investimentos dunha Comunidade de Montes cos cartos da veciñanza para facer algo positivo pola parroquia, cometeu esta agresión, arrincando a lámina que contiña a información, as fotografías e os debuxos deste gravado. Probablemente a mesma persoa que tamén atentou contra o panel explicativo do Espazo Sete Camiños no acceso á pista forestal do Pituco.

Alguén, en definitiva, resentido, frustrado, inculto e infeliz, que só acada certa satisfacción facendo mal ao crer erroneamente que así desanima e chafa a quen traballa a favor de todo o que este especimen despreza. Ao contrario, máis ganas, máis forzas e máis motivos nos dá para seguir reivindicando máis Cultura, máis Paisaxe, máis Historia, máis Natureza!

Agresión ao panel informativo dos petroglifos de Pinal de Caeiro.

 


Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair / Cambiar )

Twitter picture

Estás a comentar desde a túa conta de Twitter. Sair / Cambiar )

Facebook photo

Estás a comentar desde a túa conta de Facebook. Sair / Cambiar )

Google+ photo

Estás a comentar desde a túa conta de Google+. Sair / Cambiar )

Conectando a %s

Categorías

%d bloggers like this: