DEFENDE O MONTE PITUCO (Pornedo)

Este domingo celebrarase -se as chuvias non o impiden novamente- a ruta polo Espazo Natural e Arqueolóxico dos Sete Camiños que fora adiada en outubro polo mal tempo. Total, catro pingueiras que caeran daquela…

O punto de saída para as persoas que se inscribiron no Concello de Marín para participar nesta actividade será a arboreda do Monte Pituco ás 10:00 horas. Outra posibilidade, para quen non saiba chegar a este punto, é presentarse ás 9:30 na Praza de España, dende onde sairá un grupo de persoas.

Esta é a previsión de Meteogalicia para o domingo: se non mudan as tornas, teremos unha mañá de nubes e claros que non impedirá gozar dunha andaina en contacto coa natureza, coñecendo o patrimonio arqueolóxico do Monte Pituco (Pornedo) e dos seus arredores, e admirando a paisaxe dende o ‘balcón da ría’.

Con chuvia ou con tempo seco, con nubes ou con sol, benvidos e benvidas os que queirades achegarvos e teñades interés por apreciar as marabillas da nosa terra.