Publicado por: MontePituco | 26/06/2013

FOTODENUNCIAS

 

A vexetación xa reborda os quitamedos na curva da Pena.

O pasado mes de marzo unhas máquinas desbrozaron as marxes da estrada. A chuvia abundante das últimas semanas fixo medrar tanto a vexetación que -a estas alturas de xuño, tres meses despois- na curva da Pena xa invade a calzada e mesmo reborda o quitamedos.

Foron a por fento ao monte e deixaron tirados os botellíns de cervexa.

Hai uns días alguén foi ao Pornedo para apañar fento e estrume. Unha tarefa agrícola que se puido recuperar nesa zona grazas a que o circuito ilegal de motorismo quedou practicamente erradicado; unha actividade que impedía que medrara a vexetación natural da contorna e, por tanto, era incompatible co aproveitamento agrogandeiro do monte.

O criticable desta acción foi a neglixencia desas persoas, que deixaron tiradas unhas botellas de cristal rotas a carón de onde estiveron traballando. Terían sido máis educados e menos irresponsables cun ben comunal da parroquia se, unha vez bebido (ou comido, posto que teñen aparecido tamén latas de conserva baleiras) levaran de volta os residuos e os depositaran no contenedor correspondente.

A Comunidade de Montes debería tomar nota dun feito tan lamentable e facer as indicacións oportunas nalgunha asemblea; indicacións que son de puro sentido común pero que, á vista da pouca sensibilidade, cómpre lembrar e remarcar.

Estas bolsas cheas de restos de obra levan dende maio tirados a caron do túnel.

Dende o pasado mes de marzo levan tirados estes restos de obra a carón do túnel baixo a Variante, entre A Pena e o Caeiro. Primeiro apareceron os cascallos ciscados. Máis adiante, este verquido incontrolado medrou coa incorporación dunhas bolsas de plástico que no seu interior conteñen máis refugallos procedentes dalgunha obra.

100_2514

Os restos de obra son un mal endémico no Pituco. Principalmente na pista forestal de acceso ao monte no treito entre o cruce do Regueiriño e a mal chamada área recreativa. Cando o que cómpre aquí é unha actuación urxente para reforzar o firme con xabre ou o material que proceda para cubrir de xeito eficaz as fochancas e fendas que se forman coa erosión.

En realidade, por onde cómpre comezar é pola limpeza dos regos laterais que canalizan a baixada das augas pluviais. Mentres non se resolva o cerne do problema, todo o demais sería en balde. Estamos na época ideal para acometer esa obra tan necesaria antes de que retorne o mal tempo.

Dende febreiro levan tirados na pista estes sacos de escombros.

Que a pista do Pituco é vítima de constantes agresións é un feito constatado. Estas enormes bolsas de residuos levan tiradas dende o mes de febreiro e a vexetación xa está cubríndoas. O peor dun verquido ilegal é que se chegue a “consolidar”, que o lixo non sexa retirado, que ese feito impune non sexa reparado.

Petróglifos de Pornedo, rodeados de fento.

E cómpre volver reivindicar ante a Xunta, o Concello e a Comunidade de Montes a necesidade imperiosa de poñer en valor os xacementos arqueolóxicos catalogados e declarados Bens de Interese Cultural. En DEFENDE O MONTE PITUCO levamos anos demandando unha actuación para limpar e sinalizar os petroglifos do Pornedo e dos Sete Camiños, rodeados de fento e toxeiras, indefensos ante o risco do lume. Non vale a excusa da crise; o desembolso económico é ridículo e a repercusión social xustifica con creces este investimento.

A área de descanso a carón do Monte Pituco carece de papeleira ou bidón para depositar o lixo.

A ristra de fotodenuncias non podía rematar sen reiterar, por enésima vez, a necesidade de instalar novas papeleiras na arboreda a carón da estrada de Figueirido. Tralas queixas da veciñanza pola suciedade da zona, en DEFENDE O MONTE PITUCO volvemos facer un chamamento para que se faga un correcto mantemento desta área de esparcemento. Longamente desaproveitada, podendo converterse nun miradoiro polas súas vistas da zona portuaria e da Illa de Tambo. Pasou moito tempo “a monte”, chea de broza, ata que hai un ano por fin se procedeu á súa limpeza. Dende entón non se ten feito máis nada: a vexetación volveu medrar, o escaso mobiliario do que dispón segue deteriorado, e as papeleiras brillan pola súa ausencia.

Destas queixas darase traslado inmediato ás Administracións e entidades competentes, para que lles poñan remedio á maior brevidade posible.


Responses

  1. Rediola, pero que porcos somos! Non aprendemos nunca.


Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s

Categorías

A %d blogueros les gusta esto: