DEFENDE O MONTE PITUCO (Pornedo)

Este é o artigo número 500. Cantos millóns de palabras irán verquidas neste monte virtual, cantos centos de imaxes. Cantísimas horas de traballo, cantas! Moitos desvelos e preocupacións tamén, pero non menos motivos de satisfacción e de pulo.

Dende as bambalinas desta páxina, MOITAS GRAZAS polas case 29.000 visitas que acumula este espazo dende a súa creación en decembro de 2009. Grazas a quen nos inspira, nos anima e comparte connosco a ansia pola defensa do Monte Pituco fronte aos partidarios da súa conversión nun ermo de formigón e de asfalto. Grazas aos seres queridos, presentes e ausentes, aos que lles furtamos o tempo que pasamos do outro lado desta pantalla, tecleando motivos para conservar a natureza e os recursos históricos e culturais deste pedaciño de mundo, rebatindo con argumentos sólidos e contundentes a quen nos ataca “porque si”, difundindo as imaxes que amosan a beleza da paisaxe e a riqueza da biodiversidade.

Agardando contar coa vosa compaña e coa vosa complicidade, imos a por outros 500 artigos máis!

Galiza ceibe! Xa os bilitroques

guindan os seus corazóns polos montes!

Os chuchameles mailas carqueixas

escoarán as verdades abertas!

Todo o que é lilio, todo o que é merlo

hase esfollar polos campos galegos!

Todo o que é fonte, todo o que é fror

halle arrincar arrecendos ao sol!

Pontes de escumas, nubens de rosas

pra acariñar amantiño nas cousas!

Arcos de grilos e carricantas

pra que se abrouxen as cósmicas agras!

Regos de aves, niños de estrelas

pra rebuldar ca enxebreza da Terra!

Pazo de orballos, medas de vieiros

pra apousentar os seus pulos inmensos!

Fragas de ideias, searas de astros,

pra rebrincar polos mundos abaixo!

Arcos-da-vella de bolboretas

pra adobiar as esenzas eternas!

Beilade ceos, troulade mares

astra que tolos da baila caiades!

Medrade soutos e codesidos

que hai que abranguer tódolos infinitos!

Tódalas notas, cósmica lira,

pra descordar no nadal de Galiza!

FERMÍN BOUZA BREI: “Cántiga cívica” (1933)