Publicado por: MontePituco | 24/08/2011

PRECAUCIÓN COS CABALOS CEIBES

Esta semana houbo que requerir a presenza da Policía Local no lugar da Pena para que os axentes trataran de reconducir ata o monte a un grupo de cabalos que, na procura de pasto, chegaron á estrada, poñendo en perigo a circulación viaria e a seguridade dos conductores. Unha persoa que pasaba pola zona atopou os cabalos nunha curva pechada entre A Pena e O Caeiro. No seu intento por alonxalos dese punto, os cabalos volveron subir e a piques estiveron de introducirse na entrada da Variante de Marín, co cal a situación tería sido máis grave, pola velocidade á que se desprazan por aí os vehículos e polas dificultades que terían os equinos para atopar a saída.

Non é a primeira vez que acontece algo así, como se ten recollido nas páxinas da prensa. Entre as diversas problemáticas que presenta esta variante dende a súa construcción e posterior apertura ao tráfico -ademais dos desprendementos de terra e do trazado escarpado- tamén se atopa a irrupción de animais que, ben dende os accesos abertos, ou ben polos desperfectos causados na alambrada que a rodea, logran introducirse na zona asfaltada, ignorando o perigo que corren para a súa propia integridade e a dos usuarios do vial.

Apelamos, pois, aos propietarios de gando mostrenco, para que velen pola situación destes animais; para que se preocupen de telos seguros no monte e nunhas condicións dignas dende o punto de vista físico. Un dos cabalos avistados nesta estrada tiña os restos dun cepo nunha das patas e, aínda que as súas extremidades non estaban presas por ningún artiluxio prohibido, notábaselle ao desprazarse que tiña unha lesión permanente nese pezuño, que o facía coxear. Gran crueldade e gran cobardía do seu dono, ao que cabería preguntarlle que pasaría se un cabalo cunha pexa irrumpira na estrada e non tivera a capacidade de reaccionar con rapidez ante un posible impacto cun vehículo.

Por outra banda, cómpre ter en conta unha decisión da Xunta que hai uns días se daba a coñecer a través dos medios de comunicación: o goberno autonómico vai presentar despois do verán un novo regulamento sobre a presenza de gando ceibe no monte, que vén sendo motivo de queixa por parte dos gandeiros e das comunidades de montes cando os animais ocasionan destrozos nos cultivos das fincas particulares e nas repoboacións arbóreas. Co fin de abaratar custes, os responsables da Dirección Xeral de Produción Agropecuaria informaron os representantes da Organización Galega de Comunidades de Montes Veciñais en Man Común que se vai reducir de 15 a 3 días o prazo para reter os animais sin identificación que sexan capturados. Despois deste periodo, poderían ser adquiridos polos gandeiros e, de non ser así, acabarían sendo sacrificados nun matadeiro.

É unha situación inxusta que se podería evitar actuando con boa vontade por todas as partes: a presenza do gando é beneficiosa para o monte, porque os animais controlan o crecemento da vexetación e contribúen así a minimizar o risco de incendios; pero por outra banda, os seus propietarios terían que facerse cargo da construcción dos valados arredor dos terreos que as comunidades de montes estarían dispostas a ceder con tal de que os cabalos ou as vacas pastaran nun recinto pechado. Uns por outros, e a casa sen varrer: as reses sen identificar e buscándose a vida polo monte ante a indiferencia dos propietarios, mentres os gandeiros e os comuneiros sofren cuantiosas perdas non seus bens ata o punto de chegar a prohibir tallantemente a presenza de gando mostrenco nos montes. Un pouquiño de por favor

Máis información sobre o novo regulamento do gando mostrenco, na seguinte ligazón: “El plazo para sacrificar caballos capturados en los montes se reducirá de 15 a 3 días“. (Faro de Vigo).


Responses

  1. […] Ver tamén o artigo titulado “PRECAUCIÓN COS CABALOS CEIBES“. […]


Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s

Categorías

A %d blogueros les gusta esto: