Publicado por: MontePituco | 08/07/2019

BUROFAX Á COMUNIDADE DE MONTES

Tala a matarrasa na ladeira do Pornedo

Un grupo de propietarios de fincas situadas no lugar d’A Pena que se regan con auga procedente do rego das Presas, situado na ladeira do Monte Pornedo (Pituco), remitiulle a pasada semana un escrito vía burofax á Comunidade de Montes de San Xián nos seguintes termos:

“Como é do seu coñecemento, a auga deste regato é utilizada para o rego dunha gran cantidade de parcelas situadas n’A Bouza e n’A Pena, polo que toda corta de madeira que afecte ao regato debe contar coa previa autorización por parte do organismo Augas de Galicia (Demarcación Hidrográfica Galicia – Costa), tal e como esixe a Lei 9/2010, de 4 de novembro, de Augas de Galicia, constituíndo a súa omisión unha infracción sancionada nos artigos 85 e seguintes da citada lei, o que se pon no seu coñecemento a fin de que o teñan en conta respecto da corta a matarrasa que esta Comunidade de Montes está realizando sobre o piñeiral existente no Monte Pituco (Pornedo).

Requíreselle que, na execución da tala de madeira que están realizando a matarrasa no Monte Pituco (Pornedo), procedan de forma que quede salvagardado o citado regato, a canalización da auga do mesmo cara ás fincas (que deberá quedar limpa e libre de todo resto de corta, para evitar o seu atoamento) e demais dereitos de todos os regantes, así como de forma que se eviten futuros danos e perxuízos ás leiras d’A Pena, que se poidan derivar como consecuencia das escorrentías que poidan producirse coa chegada das chuvias, ao realizarse a tala a matarrasa nunha zona de ladeira, ao pé da cal se atopan as citadas fincas”.

Tala a carón do rego das Presas

Tala a carón do rego das Presas

A empresa madeireira, da que cómpre destacar a empatía do equipo que está traballando por encargo da Comunidade de Montes, segue derrubando todo o piñeiral que abrangue o que antano era o perímetro do polígono industrial anulado por senllas sentenzas do TSXG contra o Concello de Marín e a Xunta. Curiosa coincidencia. Supostamente o propósito é que o bosque natural forxado durante moitas décadas se convirta nunha plantación forestal que seica se dedicaría a piñeiro. Outra curiosa coincidencia: o recente anuncio de creación da Fundación Arume e da marca Pino de Galicia, co auspicio de 50 entidades do sector madeireiro e Abanca.

Tala diante da arboreda do Pornedo

Como responsable destes traballos, a Comunidade de Montes ten a obriga de garantir que non queden restos da tala ciscados, especialmente nunha zona de gran desnivel que, polo efecto da erosión e da pluviosidade, poidan afectar o rego das Presas, o rego do Pornedo e as conduccións da auga de regadío cara ás fincas da Curxeira e aledaños.

Como responsable destes traballos, e ante a posibilidade de que a corta continúe pola parte inferior da Variante, preto do núcleo de vivendas d’O Caeiro, a Comunidade de Montes tamén está na obriga de garantir a protección do conxunto rupestre catalogado de Pinal de Caeiro, coñecido como O Ciclista. Polo tanto, é imprescindible que haxa autorización previa de Patrimonio, que a tala se produza baixo supervisión arqueolóxica balizando a zona na que se atopa o xacemento, e respectando escrupulosamente a distancia de seguridade que estableza Patrimonio entre o punto no que se localizan os gravados rupestres e a zona na que se inicie a tala.

Dentro da marca en vermello, a área do petróglifo de Pinal de Caeiro

Non queremos ningunha agresión máis como a que afectou o conxunto rupestre da Carrasca en 2017. Non queremos máis ameazas contra a integridade do Monte Pornedo con talas a matarrasa que representan unha agresión ambiental en toda regra, deixando totalmente desprotexido un espazo sensible polas súas cualidades xeotécnicas, e que se sostiña grazas ás raíces do arborado que o cubría. Despois de ter o recoñecemento dos tribunais contra unha urbanización industrial ilegal, non queremos máis infraestruturas que devalúen os valores naturais, patrimoniais e paisaxísticos do Monte Pornedo, especialmente atendendo á riqueza hidrolóxica do subsolo.


Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s

Categorías

%d bloggers like this: