A lúa crecente brillaba pequeniña no horizonte e enriba dela, Venus. O demais, ruído contaminante, balbordo lumínico que impide gozar da noite, para disgusto da bichería que habita na nosa contorna, mais tamén para o propio ser humano, aínda que case ninguén se decate do dano que lle fai á nosa saúde o exceso de luz artificial cando debería reinar a escuridade.
Como era de esperar, na sesión práctica organizada no Monte Pornedo (Pituco) por Queremos Galego Marín co lema “Fotografar a noite”, fíxose patente o abuso que as vilas e cidades fan da iluminación en horario nocturno. O caso de Marín, a vista dende o ‘balcón da ría’ permite observar o escandaloso resplandor que emiten a Escola Naval, o porto ou a avenida de Ourense. Na outra beira da ría, outro foco de contaminación luminosa está ao fondo, en Sanxenxo, e tamén na poboación costeira de Poio, ademais de Pontevedra ao fondo.
Se a isto se suma o chorro de luz que se proxecta dende a ría de Vigo, atopámonos con que é practicamente imposible observar a Vía Láctea a simple vista dende esta parte da península do Morrazo. Posicionándose a carón do conxunto rupestre do Pornedo e orientándose cara ao interior da bisbarra, e facendo un esforzo de concentración, pódese definir coa ollada -ou case intuir- un tenue vapor de claridade no pouco que queda da negrura do ceo.
Cómpre ter a pericia de hábiles fotógrafos como Fran Currás de Queremos Galego Marín, e participantes na actividade como Antonio Costa e Paulo Troitiño, para tomar boas imaxes nocturnas nas que se aprecia claramente a dificultade para captar o brillo das estrelas porque, precisamente, o que máis brilla -e non para ben- é a pegada abafante e asoballadora da civilización sobre un medio natural débil e absolutamente desprotexido.
Ogallá esta actividade e a difusión que se faga da evidencia incontestable dun problema silencioso pero importante como o da contaminación luminosa, sirva para que a cidadanía tome conciencia e lle demande ás Administracións medidas para racionalizar o uso e o consumo da enerxía eléctrica. Redundará nunha mellor calidade de vida para tod@s, e empezaremos notando a mellora nos nosos petos e nas arcas do erario público.
Fotos dende o miradoiro do Pornedo
Conxunto rupestre do Pornedo
Fotos de Antonio Costa
Fotos de Paulo Troitiño con teleobxectivo dende o miradoiro do Pornedo
Foto de Fran Currás, coa Vía Láctea tralo grupo de participantes na actividade
DEFENDE O MONTE PITUCO (Pornedo) 
Deixar unha resposta