Unha das pontes que se ergueron sobre o río Verdugo é a de Comboa, que enlaza esta parroquia coa de Romariz, en Soutomaior. Aínda que de orixe romana, foi modificado nos séculos XIII-XV. Froito desa influencia medieval é que un dos tres arcos que ten é lixeiramente apuntado, mentres que os outros dous son de medio punto.
Diversas instancias sociais e políticas veñen demandando nos últimos anos que se mellore a precaria situación na que se atopa este monumento, comezando polo reforzo dos seus contrafortes e a limpeza da maleza que rodea a estrutura.
Especies invasoras e pirófitas como as acacias rodean a contorna, dificultando a visión da súa arquitectura en conxunto. Tamén se aprecian restos de lixo nas súas bases, como sinal da actitude incívica de quen acude a esta contorna para depositar toda clase de residuos.
Pero á marxe do aspecto da ponte, da necesidade de recuperala como elemento patrimonial de interese cultural, histórico, paisaxístico e turístico, o máis preocupante neste enclave é o escaso caudal do río.
Varias organizacións sociais e políticas veñen amosando a súa oposición ao trasvase de auga proxectado pola Xunta e Augas de Galicia para reforzar o abastecemento da área de Vigo.
A Plataforma en Defensa do Verdugo, que xurdiu en 2003 contra a instalación dunha ducia de minicentrais entre este río e o Oitavén, logrando que non se chegaran a instalar máis que dúas, ten que volverse reactivar case 15 anos despois para seguir defendendo a integridade do ecosistema fluvial fronte a esta nova agresión.
DEFENDE O MONTE PITUCO (Pornedo) 
Deixar unha resposta