11.000 sinaturas suma xa a petición na plataforma Change.org para amosar o rexeitamento da cidadanía á Lei de Fomento da Implantación de Iniciativas Empresariais de Galicia.
Porque na Asociación Monte Pituco levamos dende 2010 impulsando accións a prol da defensa deste espazo natural pertencente aos Montes do Morrazo fronte ás pretensións do Concello de Marín e da Xunta de instalar un polígono industrial no ‘balcón da ría’. Porque a segunda desas batallas resolveuse recentemente ao noso favor cunha SENTENZA FIRME E IRREVOCABLE do Tribunal Superior de Xustiza de Galicia ordeando a retirada do proxecto, que se incluíra no Plan Sectorial de Ordenación de Áreas Empresariais. Porque ante a maior sensibilización e a maior belixerancia social contra as agresións da Administración autonómica ao medio ambiente e ao patrimonio, o Goberno galego avanza na súa intención de blindarse fronte á oposición cidadá e á acción da Xustiza. Porque se ata agora puidemos pararlle os pés á Xunta na súa pretensión de destruír o Monte Pituco, con esta Lei de Depredación de Galicia as opcións de vitoria serían actualmente mínimas, cando non practicamente nulas. E porque aínda nos queda por derrubar o ataque directo do Concello a través do Planeamento urbanístico, que clasificou o Pituco como solo industrial. Por todo isto e máis, seguimos alerta, seguimos na trincheira.
A continuación, o texto da iniciativa.
O día 17 de outubro de 2017 está prevista a votación no Parlamento Galego da Proposición de Lei de Fomento da Implantación de Iniciativas Empresariais en Galicia, presentada polo Partido Popular e rebautizada polos movementos sociais como “Lei de Depredación de Galiza“.
Con esta lei o PP pretende desregular ámbitos como o eólico, forestal, mineiro, usos hidráulicos, cooperativas, etc. A efectos prácticos sería como modificar de golpe varias leis tratando de eliminar calquera debate público. Supón, ademais, unha ameaza absoluta ao conxunto da poboación que podería verse sometida a un uso abusivo e xeralizado da expropiación para favorecer iniciativas privadas de grandes empresas coa protección do goberno galego. Cunha lei como a que se pretende aprobar será practicamente imposíbel facer defensa do patrimonio natural galego. De feito, son tan atrevidos que mesmo incumpre normativas españolas e europeas!
Para que isto non se converta en realidade, temos que facerlles ver que contan cunha contundente oposición social, ademais da de todos os demais grupos políticos do Parlamento e dos movementos sociais. Que non van saír coa súa e aprobar estamegalei depredadora pola vía rápida mentres a xente está desinformada e pendente do que sucede noutros lugares…E aínda teñen o descaro de dicir que a redactaron cunha “ampla participación cidadá”!!!
Nós non pensamos ficar calados. E ti? Asina agora esta petición e axúdanos a difundila entre todas as galegas e galegos, por todos estes motivos:
1) EXPROPIACIÓN FORZOSA:
- Dará barra libre á expropiación por medio dos “proxectos de especial interese”, que poderá ser concedido antes da aprobación do proxecto.
- A utilidade pública das instalacións eólicas considerarase prevalente: terán dereito a expropiar o monte sen máis.
- Fará da expropiación forzosa o instrumento fundamental para o acaparamento de terras.
2) OCULTACIÓN DE INFORMACIÓN:
- Minas: é a propia empresa mineira a que determinará que datos están suxeitos a segredo industrial, furtando así esa información ás persoas afectadas.
- Haberá proxectos exentos de información pública.
- Acurtará o tempo para mirar os expedientes.
- O teu concello non terá nada que dicir.
3) REDUCIÓN DE PRAZOS:
- Menos trámites.
- Menos prazo para alegacións.
- Acurtaranse prazos para controis administrativos.
- A falta de informe da administración o empresario terá razón.
4) MÁIS DOADO SALTAR O TRÁMITE AMBIENTAL:
- Desregulación aproveitamento eólico.
- Desregulación minaría.
- Desregulación Montes.
- Incumprimento normativa europea ambiental.
5) MÁIS EUCALIPTOS:
- As autorizacións non serán necesarias para eucaliptos.
- Abondará coa “declaración responsable”.
- Perigo para os bens patrimoniais.
- En Rede Natura non precisarán autorización da Administración.
6) EXTRACTIVISMO:
- Quedará sen apenas regulación.
- Acurtaranse prazos para controis administrativos.
- Menores controis ambientais, de patrimonio, augas, etc.
- Dificultarase a participación cidadá.
7) PARQUES EÓLICOS:
- Desenvolveranse en prazos moi curtos.
- Non terán en conta criterios ambientais para escollelos.
- Facilitarase a expropiación forzosa.
- Pasarán por riba dos dereitos das persoas ou comunidades propietarias dos terreos.
8) CORRUPCIÓN:
- “Proxecto estratéxico”: o que o gobernante queira.
- “Utilidade pública”: Abondarán 20m € para o teu proxecto.
- Se tes cartos o teu proxecto poderá ser máis útil que as augas.
- Enerxía e Minas aos mandos da Xunta.
9) ACAPARACIÓN DO SOLO AGRÍCOLA:
- Desregulación de Montes.
- Pasarán por riba dos dereitos dos donos dos terreos.
- Proxecto planeado = Terra expropiada.
- Se non hai informe de Augas, abondará o que diga a mineira.
10) A MADEIRA EN MANS DOS GRANDES COMO ENCE:
- A autorización explotación forestal non será necesaria para eucaliptos.
- Tamén en Rede Natura e servidume de costa.
- Non precisarán informe de Patrimonio.
- Abondará con declaración responsable.
Tes máis información en:
-
-
e en Twitter con #LeiDepredacionGaliza
DEFENDE O MONTE PITUCO (Pornedo) 
Deixar unha resposta