DEFENDE O MONTE PITUCO (Pornedo)

A agresión provocada no grupo nº5 do conxunto rupestre d’A Carrasca, como consecuencia duns labores de desbroce que se realizaron sen sinalización previa por parte da Comunidade de Montes de San Xulián e sen control arqueolóxico, chegou ao Concello de Marín a través do escrito presentado pola Asociación Defende o Monte Pituco e polo Colectivo Ecoloxista Luita Verde. Ambas entidades tamén presentamos copia da queixa formal na delegación territorial de Patrimonio en Pontevedra.

Estes medios de protesta súmanse á denuncia presentada pola Irmandade Illa de Tambo ante o Seprona, seguida dunha segunda denuncia ante Patrimonio, secundada nesta ocasión pola entidade cultural A Forneiriña. Estes colectivos anunciaron que tamén acudirán ao Concello de Marín e á Deputación de Pontevedra para dar conta do acontecido.

Como nos confirmaron na propia delegación provincial da Xunta, o dano que se provocou neste xacemento catalogado supón unha infracción “grave”, ao aplicarse a nova Lei de Patrimonio, vixente dende agosto de 2016.

Entre tanto, axentes da Garda Civil adscritos ao Seprona visitaron hoxe o xacemento afectado polo desbroce realizado de xeito irregular. Con motivo desta xestión tamén se interesaron por un verquido de materiais de refugallo que se atopaba ao pé do camiño.

[Fotos da visita do Seprona á Carrasca cedidas pola Irmandade Illa de Tambo]