DEFENDE O MONTE PITUCO (Pornedo)

Non quixeramos ter que incorporar nunca esta imaxe tan deplorable ao xa abultado álbum de FOTODENUNCIAS que se acumulan nesta bitácora pero, como se soe dicir, “era visto”.

O panel informativo do Espazo Natural e Arqueolóxico dos Sete Camiños no acceso dende a pista do Monte Pornedo (Pituco) foi agredido, arrincando a lámina adhesiva coa información xeográfica, patrimonial e paisaxística da zona.

Xa con anterioridade sufrira algúns ataques leves, do mesmo estilo, tratando de levantar -con máis ben pouco éxito- a serigrafía que recobre o panel metálico. Os túzaros deron en pensar que o temporal de auga e vento dos últimos días abrandarían a superficie, facilitándolles a desfeita. E conseguírono…

Bravo, campións! Campións da IGNORANCIA, campións da BRUTALIDADE, campións da ESTULTICIA.

Sodes o noso estímulo; cando vós orneades, nós cabalgamos. Cando vós trousades odio contra o patrimonio e o ben común, nós collemos folgos para seguir berrando contra o polígono industrial proxectado no Pornedo.

Mentres vós tramades algunha das vosas ruindades, nós seguimos dando pasos adiante na promoción da riqueza histórica, cultural e natural do ‘balcón da ría’ e da súa contorna.

Non sentimos pena dun dano que se repara cun puñado de euros; sentimos pena de vós, panda de ‘mataos’ e covardes.

DETRITO social.

VERGOÑA.