DEFENDE O MONTE PITUCO (Pornedo)

Chega a homenaxe a Xan Montenegro en vésperas do comezo do verán, no tempo das cereixas. O monumento erixido na súa memoria rodéase de agarimo, arroupámolo con palabras e acordes sonoros. E testemuña deste acto de recoñecemento e de memoria, a silueta do Monte Pornedo debúxase no horizonte. O balcón da ría engalánase tamén con sombreiro para honrar o seu veciño e defensor máis querido.

Máis de 70 persoas reuníronse neste encontro afectuoso, que tamén serviu para escenificar a campaña de recollida de sinaturas a prol de que se lle poña o nome de Xan Montenegro á estrada de San Xulián, que el contribuiu -de xeito intenso e decisivo, diante das Administracións- a humanizar, coa construcción dunhas beirarrúas polas que a veciñanza poida camiñar máis segura. No domicilio familiar de Xan Montenegro, na Casa da Cultura de Seixo e no Ateneo Santa Cecilia de Marín atópanse tamén copias destes impresos para que quen o desexe poida sumarse a esta iniciativa. Unha iniciativa que tamén tomará forma de moción ao Pleno do Concello, para que se debata nunha próxima sesión da Corporación Municipal de Marín.

Julio Santos Pena comezou este acto de 5º cabodano trazando unha semblanza vital e profesional de Xan, do seu compromiso político, social e cultural. Coherencia e xenerosidade marcaron a súa existencia, lembrou despois Mari Carmen Santos na súa intervención. E canda eles, outras persoas tamén achegaron o seu gran de area; algunhas tan achegadas a Xan como Xosé Vilas ou a súa curmá Esther.

Versos de Manuel María, de Celso Emilio Ferreiro… a música vibrante de Tati & Lía, a gaita solemne de Felipe Rea interpretando o himno galego… Literatura, música e cultura no recordo, na admiración e no recoñecemento para unha figura fundamental na historia recente da nosa parroquia, do noso concello, da nosa bisbarra; único e irrepetible en Galicia e no mundo enteiro.

…Unha vida de novela que ogallá poidamos ver escrita algún día, non moi lonxano.