Vai polos compañeiras e compañeiros de múltiples andainas que militades no bando da sensibilidade co medio ambiente, da protección do patrimonio histórico e cultural, do respecto á paisaxe. Que non cuantificades en euros o avance da sociedade porque priorizades valores intanxibles como o coñecemento, a calidade de vida, a solidariedade, o diálogo.
Por moito que berren, por moito apoio político e económico que teñan, os pro-polígono partidarios do formigón e do asfalto, non representan o futuro, senón un modelo caduco de desenvolvemento; son o espello da especulación.
É unha honra compartir camiño con aliados da natureza, da ciencia e da cultura. O Monte Pituco e o Espazo Sete Camiños son o punto de encontro dos nosos pasos e das nosas ideas. Que poidamos compartir moitos momentos admirando mámoas e petroglifos, castiñeiros e cogomelos, miñatos e saramagantas, flores de xesta, solpores no ‘balcón da ría’.
[Fotografías por cortesía de María López, que participou na Ruta Cultural organizada polo Concello de Marín]
[Preto da encrucillada dos Sete Camiños]
[Outeiro das mouras, Salcedo]
[Plantación de castiñeiros, Lourizán]
[Chegando ao Miradoiro do Pornedo (Pituco), San Xulián de Marín]
[Cíes ao fondo]
[Illa de Tambo]
[Marín, dende o miradoiro do Pornedo]
DEFENDE O MONTE PITUCO (Pornedo) 
Deixar unha resposta