A Agrupación Cultural Ronsel volve coordinar un ano máis a limpeza do río Loira, no marco dunha campaña de limpeza dos ríos que organiza Adega de forma simultánea en toda Galicia. Grazas á sensibilidade ambiental de Ronsel e das persoas que se suman a esta iniciativa, a vila de Marín pode figurar no mapa dos concellos comprometidos coa boa saúde dos nosos ecosistemas fluviais.
A ASOCIACIÓN MONTE PITUCO puido participar o ano pasado nesta xornada, tal e como contamos no artigo titulado “REMONTAR O RÍO… LOIRA“. E dende MONTE PITUCO animamos a veciñanza a colaborar nesta acción, por necesaria, positiva e beneficiosa.
O punto de encontro será ás 10:00 horas na Casa da Cultura de Seixo, onde se formarán dous grupos de traballo: un actuará a partir da ponte da circunvalación para avanzar río abaixo, mentres que o outro comezará na praia de Loira para continuar río arriba. O Concello de Marín vai achegar luvas e bolsas, ademais de retirar posteriormente o lixo que sexa retirado.
Adega tamén contribúe a asesorar os grupos de activistas con indicacións sobre seguridade e consellos para actuar no río sen perxudicar o equilibrio ecolóxico.
DEFENDE O MONTE PITUCO (Pornedo) 
Deixar unha resposta