DEFENDE O MONTE PITUCO (Pornedo)

Seguimos con moito interese a xestión da Comunidade de Montes de Salcedo, que nos parece un exemplo en moitos aspectos: na mellora do monte veciñal con criterios de sostibilidade, de aposta pola eliminación de especies invasoras e de repoboación con especies autóctonas; na recuperación do patrimonio etnográfico, coa rehabilitación de muíños e sendeiros antigos; no respecto polo patrimonio arqueolóxico son un colectivo modélico, de colaboración coa Administración local para levar a cabo medidas enfocadas á posta en valor da arte rupestre e máis recentemente do castro das Croas; de traballo serio e constante no trato acadado co Ministerio de Defensa para recuperar os terreos que viña ocupando a Brilat e para obter un canon xusto e vantaxoso polas parcelas cedidas malia os atrancos que puxeron outras comunidades ao romper a unidade das entidades implicadas na negociación…

Porque todo ou practicamente todo canto fan é digno de coñecer a fondo para aprender da súa experiencia, intentamos non perder ningunha das súas actividades. Nesta ocasión foi un roteiro polos muíños da parroquia, algúns deles -os de Outeiro e os do Batán- restaurados co traballo dos propios veciños coa axuda do Concello de Pontevedra tanto en material como en fondos económicos.

A Comunidade de Montes de Salcedo tamén actúa como mecenas da Cultura apoiando a elaboración de traballos audiovisuais e estudos de investigación que logo toman forma de documental ou publicación impresa. É un orgullo que unha parroquia non esqueza as súas raíces, que os seus habitantes participen activamente na re-construcción da súa propia historia, porque os seus fillos e netos medrarán coñecendo o lugar no que viven, coas súas lendas, coa súa toponimia, cunha identidade colectiva de base.

Na andaina participaron Ramón Laxe, da Asociación de Veciños Heroes do Campo da Porta, o presidente da Comunidade de Montes de Salcedo, Fernando Pintos, o antropólogo Rafa Quintía, Manuel Domíguez da empresa de estudos ambientais Ventos, e o edil de Patrimonio do Concello de Pontevedra, Luis Bará. Canda eles, moitos veciños e veciñas, maiores e cativos. Noraboa a tod@s!

No muíño de Pereira, privado, aínda en funcionamento

Nos muíños de Outeiro, rehabilitados pola veciñanza

Bordeando o río do Batán, un espazo fresco e cheo de vexetación

Visita ao castro das Croas, onde se investiron 129.000 euros con apoio dos fondos europeos FEDER para excavar o poboado, cunha antigüidade arredor de 2.500 anos

Nestes días taláronse varios eucaliptos a carón do castro das Croas, que melloran a visibilidade do espazo

No castro das Croas resalta a monumentalidade da muralla, que en breve será protexida con sacos e cunha tea especial, ata o ano 2015, cando agardan retomar os traballos de prospección arqueolóxica

Na parte interior da muralla, onde apareceron restos cerámicos e vexetais que se enviaron a analizar

Nos muíños do Batán, rehabilitados polos veciños coa axuda do Concello de Pontevedra. Está previsto converter un deles nun museo etnográfico

Para salvar o desnivel e facilitar a accesibilidade, construiuse unha escada de madeira que enlaza todos os muíños

Son catro os muíños do Batán; tres deles de planta rectangular e teito a unha auga, e un máis grande no que houbo vivenda