Publicado por: MontePituco | 22/08/2011

IMPUGNACIÓN DA ASEMBLEA DA COMUNIDADE CELEBRADA EN XULLO

Alea iacta est! A Comunidade de Montes Veciñais en Man Común de San Xulián de Marín renovou a súa xunta rectora. Poucas sorpresas. Repiten os pésimo presidente e o requetepésimo vicepresidente que estaban, incorporan a un secretario do que ata agora temos un bo concepto persoal e que abofé o fará moito mellor que o secretario saínte (que volve ao seu anterior posto como vocal), e fichan a unha tesoureira á que endexamais vimos presente nunha asemblea da Comunidade. Pero do relato da asemblea extraordinaria de onte -“grandioso” espectáculo: máxima expresión da manipulación e da antidemocracia- ocuparémonos nun próximo artigo.

Porque o que toca é falar dunha das incidencias da sesión: a entrega, ao recuncado presidente, dun escrito de impugnación asinado por varios comuneiros, contra a reunión do pasado mes de xullo e contra a acta da asemblea precedente de decembro de 2009. A moitos asistentes a esta esperpéntica xuntanza seguro que lles pasou desapercibida a entrega deste documento, por dúas razóns fundamentalmente.

Antes do inicio da asemblea, fíxose ademán de entregar o escrito ante a xunta rectora e de solicitar permiso para a súa lectura. O presidente negouse a admitir o recurso alegando que “non é día para recoller escritos”, posto que na orde do día só figuraba a lectura e aprobación da acta anterior, a presentación de candidaturas e a elección da nova directiva. Por tanto, sen opción ao apartado de rogos e preguntas, o presidente rexeitou o documento e deu comezo á asemblea sen máis preámbulos.

Tivo que ser despois de levantarse a sesión cando, despois de insistirlle ao presidente que se non recollía o escrito estaba vulnerando o artigo 70 dos estatutos da Comunidade de Montes (“…os acordos da asemblea xeral contrarios á Lei de Montes Veciñais en Man Común, os que infrinxan as presentes ordenanzas, e os non adecuados aos intereses xerais da propia Comunidade, poderán ser recurridos por calquera comuneiro ANTE A PROPIA ASEMBLEA XERAL…”) e, por tanto, tería que aterse ás consecuencias, fora desde o punto de vista administrativo ou legal. Entón si entrou polo aro: recolleu unha copia do escrito e fíxolle un garabato á outra, que nin selo oficial da Comunidade de Montes lle quixo poñer.

Eis o carácter continuista das “formas” da xunta rectora, do disgusto e da desgana coa que afrontan as críticas -perfectamente xustificadas- do sector crítico coa súa xestión. Que sigan manipulando, que sigan mentindo con tanta torpeza e, para mostra, un botón: na lectura da acta correspondente á asemblea do pasado 31 de xullo figuraba que a afluencia de comuneiros fora do 30% (os estatutos establecen que só será válida cun mínimo do 25%). Non puidemos disimular unha gargallada nada máis escoitar unha trola tan descarada, posto que na reunión de xullo malamente había 50 persoas na sala, das cales igual unha ducia ou, como moito unha vintena, tiñan dereito a voto como comuneiros. Na asemblea de onte habería o triple de persoas, por máis que o censo de comuneiros é de 532. Alguén tivo a feliz idea de exclamar ao comezo da sesión: “Onde está o censo?”, o que obrigou a pasar lista.

O máis pavero, triste, macabro e ridículo, foi que nese censo -que para a celebración dunhas eleccións tiña que estar perfectamente (ou case) actualizado- nombráronse moitas persoas falecidas, o que motivou a queixa de moitos dos presentes.

E o peor, o máis “cantoso”, onde se demostrou -para calquera que teña dous dedos de fronte- que a xunta rectora quedaba co cu ao aire, con perdón, foi o seguinte: dos máis de 500 citados, segundo as contas do presidente, contabilizáronse presentes 76 comuneiros con dereito a voto. É dicir, facendo unha sinxela regra de tres, só o 14% do censo. Como poden ter a desfachatez de intentar “colar” que na asemblea anterior, con moitísima menos xente, había un 30% do censo? De modo que hai unha palabra que define perfectamente o “modus operandi” desta xunta rectora, a de antes, e a dos próximos catro anos, posto que a composición é practicamente a mesma: TONGO!

 

 

 


Responses

  1. […] -Impugnación da asemblea celebrada en xullo (22 de agosto de 2011) […]


Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s

Categorías

A %d blogueros les gusta esto: