Publicado por: MontePituco | 13/08/2011

HIPÓTESES DUNHA CARTA OFICIAL

A Asociación DEFENDE O MONTE PITUCO (PORNEDO) recibe unha carta da Xefatura Territorial da Consellería de Cultura e Turismo en Pontevedra. O xefe do servizo de Patrimonio Cultural, Ignacio Diz, expón o que xa se relatou anteriormente no artigo titulado “Visita do Seprona e de Patrimonio”: que trala inspección pertinente dun técnico, esta Administración fará as xestións necesarias para que se acondicione adecuadamente a área arqueolóxica do Monte Pornedo, ao tempo que agradece o interese deste colectivo veciñal pola mellora e posta en valor destes elementos históricos. O xefe territorial de Patrimonio Cultural engade na súa misiva que no departamento que dirixe “RECIBIMOS ESCRITO DO SEPRONA, DO QUE XUNTAMOS COPIA, PARA O SEU COÑECEMENTO E EFECTOS OPORTUNOS”. Do informe do Seprona non hai nin rastro no interior do sobre. Porque o sobre foi manipulado antes da entrega á entidade destinataria. Porque a lapela foi pegada cutremente con dúas tiras de cinta adhesiva. Que sucedeu?

1ª hipótese: O funcionario/a da Xunta esquece adxuntar o informe do Seprona e cando vai pechar o sobre, a lapela non ten pegamento abondo e decide fixar mellor o papel con dúas tiras de cinta adhesiva para que a carta non se abra.

2ª hipótese: O funcionario/a da Xunta esquece adxuntar o informe do Seprona e cando xa pechou o sobre, decátase de que lle quedou atrás esa documentación, polo que volve abrir a carta, introduce o que quedara fóra e, en vez de coller un sobre novo (…estamos en crise), aproveita o mesmo, pechándoo seguidamente con dúas tiras de cinta adhesiva.

3ª hipótese: O funcionario/a da Xunta introduce no sobre a carta do xefe do departamento máis o informe do Seprona, péchao e sae por correo ata a oficina postal de Marín, onde o repartidor/a da zona de San Xulián o deposita no buzón do enderezo indicado. Algunha persoa con curiosidade exacerbada, coas mans longas, e amiga da correspondencia allea, manipula o buzón do destinatario, colle e abre a carta, rouba o informe do Seprona, pega o sobre con cinta adhesiva e volve depositalo no buzón.

4ª hipótese: O funcionario/a da Xunta introduce no sobre a carta do xefe do departamento máis o informe do Seprona, péchao e sae por correo ata a oficina postal de Marín, onde o repartidor/a da zona de San Xulián entrega a carta, por erro, nun enderezo que non corresponde co sinalado. En vez de devolvela na oficina postal ou depositala no buzón que corresponde correctamente, a persoa que ten nas súas mans esa carta, decide abrila, ler o seu contido e quedar para si o informe do Seprona, pechando o sobre con cinta adhesiva e deixándoo no buzón do verdadeiro destinatario.

Cabe algunha outra hipótese razoable? Cal destas será a máis atinada? A onde foi parar o informe do Seprona? Estará xa o informe, a través de cauces espúrios, en poder dos responsables da entidade que ten que facer fronte a cuantiosas sancións económicas motivadas polas malas condicións de conservación do monte? “Quen” gaña “que” obtendo de forma ilexítima un informe que, de todas maneiras, ía facerse público? Porque neste blogue TODO é transparente. Non como noutras entidades onde as contas son opacas, onde se contesta as críticas con ataques, onde se descoñecen os motivos concretos das multas que impón a Administración.

…Conseguiremos ese informe. Mentres tanto, de atoparse onde non corresponda, que o seu receptor/a e/ou posuidor/a vaia buscando no diccionario o significado de palabras como honradez, honestidade, legalidade ou civismo.


Responses

  1. […] -”Hipóteses dunha carta oficial“. […]

  2. […] os artigos titulados "Hipóteses dunha carta oficial" e "A carta de Patrimonio, na […]


Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s

Categorías

A %d blogueros les gusta esto: