Publicado por: MontePituco | 12/08/2011

SOBRE O CANON DA AUGA: O TAPADO DE AGOSTO

Na páxina web da Xunta atópase o documento titulado “Anteproxecto de Decreto polo que se aproba o regulamento do réxime económico e financeiro do CANON DA AUGA e do coeficiente de vertedura a sistemas públicos de depuración de augas residuais”. Ese documento no que ía estar “a nai do año” sobre a polémica nova Lei de Augas que tantos ríos de tinta fixo correr a principios deste ano, con duras críticas que foran sobradamente cacarexadas dende o anterior goberno local polo grupo municipal nacionalista, embarcado nunha xira estelar de charlas polas parroquias.

Pois o anteproxecto do decreto xa é unha realidade. 54 páxinas para ler de vagariño, sen présa, pero sen pausa, porque non se indica expresamente en ningures cal é o prazo para a presentación de alegacións. Algún experto/a na sala que o saiba, a tenor do que establece ao respecto o artigo 38.4 da lei 30/1992, do 26 de novembro de réxime xurídico das administracións públicas e do procedemento administrativo común?

O regulamento atópase, pois, en trámite de audiencia e as suxestións poderanse presentar ante Augas de Galicia ou, de forma telemática, nun formulario que ofrece a propia Consellería de Medio Ambiente, Territorio e Infraestruturas na mesma web. A ligazón na que se pode atopar esta información é http://medioambiente.xunta.es/disposicionsXerais.do

Ao igual que noutras ocasións máis ou menos cruciais, como cando se fixo a exposición pública das Directrices de Ordenación do Territorio, a Xunta escolle a época do ano máis doada para “colar” documentos que pasen desapercibidos. Atopámonos, entón, en pleno agosto, co anteproxecto desta nova Lei de Augas, sobre a que o Colectivo Nacionalista de Marín advirte que o Concello “pagará o dobre polo canon da auga”. Así o explica nunha nota informativa que se reproduce a continuación.

A Xunta de Galiza anunciou recentemente que vai dobrar o prezo do canon da auga, afectando esta suba a Marín e a outros moitos municipios, sobre todo onde o saneamento depende da administración autonómica. O Conselleiro de Medio Ambiente, Territorio e Infraestruturas, o Sr. Hernández, comunicou que esta suba será efectiva antes de que remate o presente ano.

O Presidente, e en días posteriores o Conselleiro, anunciou a elaboración dun decreto de colaboración técnico-financeira entre a Xunta e os concellos que abrirá as portas ao control do cobro do canon da auga.

Estamos ante o primeiro paso na aplicación dunha lexislación regresiva e lesiva para os intereses xerais, que pon o tratamento, subministro e depuración da auga no punto de mira privatizador do PP. Primeiro entregándolle a xestión a Augas de Galiza, despois convertendo a este ente autónomo nunha sociedade anónima, abrindo así a posibilidade da entrada de capital privado.

Ademais, ao financiar o saneamento cun canon e non con orzamentos autonómicos estamos ante unha nova discriminación dos que menos teñen, que van pagar o mesmo que os que máis teñen. O PP segue adiante co seu modelo neoliberal e fai que paguen menos os de maior capacidade económica.

Cúmprese así o denunciado antes das eleccións municipais polo Colectivo Nacionalista e outras organizacións cando avisabamos das intencións da Xunta de incrementar os recibos polo consumo de auga ao se implantar a Lei de Augas de Galiza. As promesas feitas polo PP de que a Lei non suporía un incremento nos recibos demóstranse como mera estratexia electoral.

Volvemos reiterar que as vivendas do rural tamén se van ver afectadas pola aplicación desta lei, por moito que prometeran e dixeran os dirixentes do PP. Terán que pagar como os habitantes das zonas urbanas o canon de saneamento e verán incrementado o recibo polo consumo.

Esta é a “austeridade” do PP, ir eliminando pouco a pouco o sector público, o que é de todos nós, para entregarllo a prezo de saldo a grandes grupos empresariais afíns.


Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s

Categorías

A %d blogueros les gusta esto: