Publicado por: MontePituco | 05/08/2011

VISITA DO SEPRONA E DE PATRIMONIO

Axentes do Seprona e técnicos de Patrimonio estiveron esta semana no Monte Pornedo, cada un pola súa conta. Uns verificando a situación dos verquidos ilegais que se notificaron recentemente; outros comprobando o estado sustancialmente mellorable dos petroglifos existentes no Monte Pornedo.

…Hai quen di que redactar informes e presentalos perante as institucións é unha perda de tempo. Que non serve para nada porque son papeis que rematan no lixo ou arrumbados nunha carpeta calquera. Arquivados, esquecidos, condenados ao silencio administrativo. Quen difunda esa idea quizais teña certo interese en sementar intencionadamente a filosofía do pasotismo. Tal vez porque pretenda que nada cambie, pensando no seu propio beneficio. Moi ao contrario, practicamente todos os escritos enviados por DEFENDE O MONTE PITUCO, tanto a departamentos da Xunta, como ás autoridades ambientais, tiveron unha constestación -máis ou menos satisfactoria, máis ou menos convincente, pero unha resposta ao fin e ao cabo- ou mesmo deron pé a que os seus destinatarios contactaran co asociación para recabar máis información.

Esta semana os axentes do Seprona inspeccionaron os arredores do depósito de auga do Caeiro, onde puideron comprobar a presenza de material de obra tirado ao pé do camiño. Probablemente percorreran tamén a pista que se adentra no monte para verificar que as imaxes expostas neste blog -e que foron facilitadas ao destacamento do Seprona no Morrazo- reflicten a crúa realidade.

Na asemblea da Comunidade de Montes celebrada o pasado 31 de xullo, e da que se vai seguir informando en artigos posteriores, o presidente revelou que a Xunta impúxolle a San Xulián dúas sancións de 500 e 3.000 euros polas que “vamos pagar todos”. O presidente criticou en público que sexan comuneiros da propia parroquia os que cometen estes feitos e que ninguén os denuncie. Nos últimos días, segundo un dos veciños da zona, a xunta rectora deu parte dun camioneiro que realizou varias viaxes ao monte para depositar os restos dunha obra que se estaba realizando nunha rúa de Cangas. Impresionante, de ser certo.

Por outra banda, un arqueólogo da delegación provincial de Patrimonio desprazouse hoxe mesmo ata o Alto do Pornedo para levantar acta da situación na que están os petroglifos catalogados nesa zona de alto valor prehistórico. Polos escritos e as imaxes que se cursaran ante a Xunta, tiña coñecemento previo de que nese lugar fora abandoado e incendiado un vehículo, e que o espacio viña sendo utilizado para a práctica ilegal do motociclismo. Precisamente, o detonante para que a este técnico se lle encomendara a elaboración deste traballo de campo foi unha denuncia do Seprona.

A súa visita dará pé a un informe que será elevado á sede central da Dirección Xeral de Patrimonio en Santiago, dando conta da presenza de maleza arredor dos gravados rupestres, da suciedade adherida ás pedras e da proximidade dun camiño que, de momento, no afecta directamente sobre os petroglifos. A fonte desta información é o propio arqueólogo que, ademais, foi tan amable de orientarnos sobre as actuacións que serían precisas para poñer en valor estes recursos arqueolóxicos, para o que cómpre unha autorización de Patrimonio que se obtería sen ningún impedimento, previa presentación dun sinxelo proxecto detallando as medidas que se adoptarían.

Bastaría, segundo explicou, con facer unha coidadosa limpeza da vexetación que rodea os gravados e de balizar a zona, cun cercado de madeira; completando a actuación coa instalación dun cartel. Nada do outro mundo. Como teñen feito en Ponte Caldelas, en Cotobade, ou en Campo Lameiro, cos petroglifos que enriquecen o valor dos seus montes. Dando un paso máis aló, que sería o desexable, e contando coa supervisión dun arqueólogo de Patrimonio, mesmo sería posible facer unha pequena excavación para comprobar se algún petroglifo descoñecido se atopa oculto debaixo da maleza, do musgo e da terra acumulada.

Por iso paga a pena loitar, insistir e non decaer. Porque tarde ou cedo, pouco a pouco, van madurando os froitos deste esforzo a prol da conservación do Pornedo. Pediamos carteis sinalizadores, e foron instalados pola Comunidade. Pediamos que os responsables municipais recibiran a DEFENDE O MONTE PITUCO, e non só nos recibiron senón que subiron ao monte. Denunciamos o perigo que supoñen os verquidos e alertamos do abandono do patrimonio arqueolóxico, e as autoridades competentes interésanse por estas problemáticas.

Por iso paga a pena loitar, insistir e non decaer. Esta toalla ten moitas suores que enchoupar. E nunca vai acabar tirada no cuadrilátero de combate.


Responses

  1. Impecable el comentario. Enriquecedor y útil. No han caído en saco roto vuestras reivindicaciones. Me temo que el abandono de esa zona se debe más a la ignorancia y a la falta de información que había y hay sobre la riqueza natural y arqueológica. Que haya actuado el Seprona y Patrimonio es un avance y no pequeño. Ahora ya están enterados. Solo falta insistir para que las cosas lleguen a buen puerto. Tu labor Montepituco es impagable. Mi enhorabuena por lo conseguido hasta ahora.

    • Moitas grazas, Erasmo. Alguén o tiña que facer. E nós temos a forza, e sobre todo, a educación que outros desdeñan. Benvidas sexan as túas palabras de ánimo.

  2. […] de Patrimonio Cultural, Ignacio Diz, expón o que xa se relatou anteriormente no artigo titulado “Visita do Seprona e de Patrimonio”: que trala inspección pertinente dun técnico, esta Administración fará as xestións […]


Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s

Categorías

A %d blogueros les gusta esto: