DEFENDE O MONTE PITUCO (Pornedo)

Derrumbar ese muro é un acto de violencia, non de xustiza. Derrumbar ese muro pola forza non é un acto de valentía, senón de nocturnidade, premeditación e alevosía. Derrumbar ese muro non só non arranxa o conflicto, senón que o agrava porque pode acarrear responsabilidades de maior calado xurídico. Derrumbar ese muro non é defender o Monte Pituco, é abocar o Monte Pituco a unha longa sucesión de querelas e pleitos, de acusacións cruzadas que desgastarán máis aínda a precaria economía da Comunidade de Montes. Derrumbar ese muro non é defender o Monte Pituco, porque o Monte Pituco deféndese limpamente por si só, pola sensatez dos seus veciños e, chegado o extremo, ante as institucións públicas ou pacificamente na rúa. Por eso, a xunta rectora da Comunidade de Montes está na obriga de facer que non se cometan actos vandálicos que perxudican a imaxe desta parroquia e que obstaculizan a acción da xustiza. Que a Comunidade de Montes se adique a buscar a documentación que precisa para demostrar de xeito irrefutable a titularidade comunal dese terreo. Que atope os documentos que os propios directivos recoñeceron na última asemblea xeral que teñen extraviados ou en poder de antigos dirixentes. Que espabilen, que isto ten pinta de ir para longo.