A Plataforma en Defensa dos Montes do Morrazo denuncia que no sendeiro ecolóxico do Morrazo hai tempo que falta a sinalización preceptiva do roteiro
A Plataforma en Defensa dos Montes do Morrazo organizou un roteiro para dar a coñecer a importancia natural, paisaxística e cultural da serra da Madalena, situada entre as parroquias de Darbo e Aldán (Cangas) e de Bueu. Partindo do IES María Soliño, en Monte Carrasco, a andaina transcorreu por pistas forestais e camiños, así como polo GR-59 do Sendeiro Ecolóxico do Morrazo, atravesando os lugares de A Madalena, Monte Liboreiro, Outeiro Agudo, Mesa de Montes, Alto de Carballiño, Monte das Fentiñas e Monte Carrasco.
Visitamos plantacións forestais con carballo e castiñeiro de Monte Carrasco, e puidemos gozar de fermosas panorámicas dende o Monte Liboreiro, situado a 334 metros de altitude sobre o nivel do mar. Un monte onde tamén destaca a presenza dun antigo castro.
Vista dende o Monte Liboreiro
No Monte Liboreiro, a carón do castro, situado por riba do polígono buenense de Castiñeiras
O monte Liboreiro, que limita os concellos de Cangas e de Bueu, está catalogado e inventariado dentro do Rexistro de Patrimonio Cultural de Galicia porque presenta vestixios arqueolóxicos de varias fases prehistóricas e históricas: dende a Idade do Bronce e a Idade do Ferro ata a época romana e medieval. Destacan os restos das murallas do seu castro, no que -a principios do século pasado- foron atopadas tres aras votivas dedicadas a un deus lar de nome Verore ou Aerno, ademais de aparecer vestixios de varias vivendas aterrazadas, xunto con fíbulas, moedas e cerámica.
O seu alto posúe unhas amplas panorámicas das rías de Pontevedra e Aldán até a enseada de Bueu.
O arquipélago de Ons e Onza, dende o Monte Liboreiro
Enseada de Aldán, dende o Monte Liboreiro
A enseada de Aldán e as illas Cíes ao fondo, dende o Monte Liboreiro
A penedía de Outeiro Agudo (a 305 metros de altura) tamén é coñecido como “monte da vixía ou da garita”. Trátase do terceiro pico máis alto da serra: no seu curuto afiado aínda segue unha antiga edificación retangular de pedra, cunha probable función de observatorio, como dan a entender os distintos topónimos.
Está inventariada a presenza dun petróglifo da Idade do Bronce e un asentamento da Idade Moderna. Posúe unhas amplas panorámicas das rías de Vigo e de Pontevedra.
En Mesa de Montes
O arquipélago de Ons a un lado…
…Ao outro lado, o arquipélago de Cíes.
O lugar de Mesa de Montes (a 300 metros sobre o nivel do mar) fai de paso entre o Alto de Outeiro Agudo e o Alto do Carballiño.
Está inventariada a existencia dun asentamento do Calcolítico. Destacan as vistas do monte aberto, ademais das panorámicas cara á ría de Aldán.
No Alto do Carballiño
O alto de Carballiño (332 metros) é o segundo pico máis elevado da serra da Madalena. Presenta vestixios arqueolóxicos dun asentamento do Calcolítico.
Na parte máis alta ofrece amplas vistas da ría de Vigo e dende a parte baixa divísanse as vistas panorámicas máis amplas da ría de Aldán, da que fai función de verdadeira atalaia, coas Illas Cíes ao seu carón polo Sur e as Ons polo Norte fronte a Cabo Udra.
A penedía conforma un espazo de singular importancia xeomorfolóxica e paisaxística e, ao seu arredor, habita unha interesante breixeira, toxeira e vexetación pioneira nas rochas consideradas como hábitats de interese comunitario a nivel europeo, que dá acubillo a unha non menos importante fauna vertebrada e invertebrada de espazos abertos.
A importancia da breixeira ou “carrasqueira” ten relación directa tamén coa toponimia local, xa que de aí procede o topónimo Monte Carrasco. Até o pasado non tan afastado o monte baixo tivo unha grande importancia socioeconómica a nivel agroforestal como forraxe e abastecemento de biomasa para a camada animal e o abonado das áreas de cultivo agrícola.
As plantacións forestais con carballo e castiñeiro que atopamos ao longo da ruta pertencen ao monte comunal das veciñas e veciños da parroquia de Darbo e representan unha interesante masa de frondosas cunha importante función como bosque caducifolio, promovendo a biodiversidade faunística, florística e micolóxica dentro dunha das áreas máis favorables, fronte á forte rochosidade e o desnivel que predomina ao longo da serra.
O petróglifo da Idade do Bronce de Pinar do Rei, no Monte das Fentiñas, catalogado como Ben de Interese Cultural, é un dos máis completos do Morrazo pola variedade de gravados que contén, dende coviñas e círculos concéntricos ata zoomorfos, antropomorfos e escenas de montería e caza.
Lamentablemente atópase nun estado de conservación moi deficiente: rodeado de acacias, con herba da Pampa medrando na propia laxe, con armazóns metálicas nas súas inmediacións e construccións que non respectaron a área de cautela deste gravado.
Para a Plataforma en Defensa dos Montes do Morrazo, as principais afeccións que ameazan a Serra da Madalena son os monocultivos forestais, a eucaliptización, a invasión da Acacia melanoxylon e da Acacia mearnsii, a corta indiscriminada de arborado autóctono, a apertura de pistas, verteduras de entullos, antenas emisoras de telecomunicacións, a falta de protección, conservación e posta en valor do patrimonio cultural, o proxecto nas proximidades do parque empresarial e industrial do Morrazo, a especulación urbanística cos montes de Aldán e a falta dunha protección ambiental que vaia máis alá da simple catalogación actual de solo rústico de especial protección forestal.
Por consideralos uns espazos naturais de alta importancia ambiental e corredor ecolóxico, a Plataforma solicitoulle á Dirección Xeral de Conservación da Natureza da Xunta -en marzo do 2012- a ampliación da Rede Natura galega cara a un novo Lugar de Importancia Comunitaria que recollera os espazos naturais dos Montes do Morrazo e do Carballal de Coiro, máis outros ampliables, entre eles a serra da Madalena e o Monte Borrallido.
DEFENDE O MONTE PITUCO (Pornedo) 
Deixar unha resposta