DEFENDE O MONTE PITUCO (Pornedo)

Este sábado ás 12:30h, diante do monumento de homenaxe a Xan Montenegro, no lugar do Carballal, en San Xulián, celebrarase un novo acto de lembranza a este benquerido veciño da parroquia, con motivo do seu 4º cabodano. Como pasa o tempo!

Para a Asociación Monte Pituco, este encontro terá unha significación especial, trala creación do Espazo Natural e Arqueolóxico dos Sete Camiños, que abrangue o patrimonio ambiental e prehistórico do Monte Pituco (Pornedo), que Xan Montenegro tanto contribuíu a promocionar e defender das agresións que sufría, fronte á incomprensión das Administracións, e á insensibilidade de propios e estranos.

Quen sabe se algún día sexamos quen de recuperar, de desenterrar da vergoña e do esquecemento, o petroglifo que Xan Montenegro intentou protexer cando as obras da Variante de Marín converteron a fermosa carballeira e o regato do Pornedo nun antiestético terraplén e nun recheo de áridos que levou por diante un anaco da nosa historia, que quedou sen catalogar…

[Artigo do arqueólogo marinense Álvaro Arizaga, publicado no Faro de Vigo, 26 de xuño de 2011]

Pero ademais dunha persoa que entregou unha parte importante do seu tempo a loitar pola mellora da parroquia a través da Asociación de Veciños de San Xulián -que nunca voltou ser o mesmo sen o seu liderado-, un firme defensor do monte veciñal, un divulgador do noso patrimonio e un promotor da nosa cultura, Xan Montenegro destacou tamén polo seu compromiso coa protección da ría.

Precisamente, a Asociación Pola Defensa da Ría​ -da que era socio- vaille dedicar a Xan Montenegro a Marcha contra Celulosas que se celebrará esa misma tarde, con saída ás 19:30h dende as alamedas de  Marín e Pontevedra. O alento e a enerxía de Xan impulsará os pasos dos asistentes a esta mobilización, para reclamar a recuperación da ría para a explotación racional e sostible dos seus recursos pesqueiros e marisqueiros, do seu potencial turístico e paisaxístico.