Publicado por: MontePituco | 04/11/2013

SEGUEN AS DEFICIENCIAS NA ARBOREDA DO PITUCO

Fonte instalada na arboreda do Pituco, sen billa (novembro de 2013).

[Fonte sen billa, novembro de 2013]

Este pasado verán Defende o Monte Pituco queixouse do desmantelamento repentino do “mobiliario” que se instalara no recheo que deu lugar á chamada área recreativa do Pituco, e que foi trasladado á arboreda situada a carón da estrada de Figueirido, preto do cruce co Regueiriño. Non pola mellora que puidera experimentar a dotación desa arboreda, que gañou unha fonte, unhas poucas mesas e bancos de pedra máis. Senón porque con esta medida estábase desvirtuando a función dun lugar creado artificialmente polos ideólogos da Variante de Marín, co consentimento da Comunidade de Montes, que daquela presentou a xestión como un logro que non foi tal: non só se destruiu unha carballeira única, senón que no seu lugar depositouse un cargamento de terra de dubidosa procedencia que encheu a zona de plantas invasivas; por ribas, nas obras sepultouse un gravado rupestre pendente de catalogación e, ao pouco tempo, aquela área recreativa apartada e carente de mantemento, foi pasto dos vándalos e dos amigos do alleo.

Tres meses despois daquela actuación na arboreda, o espazo segue presentando deficiencias. Seguen as mesas e os bancos de pedra reubicados, afortunadamente:. Instalaron un bidón para depositar lixo, despois de non poucas peticións lanzadas neste blogue. Pero a fonte que se trouxo do Monte Pituco -inconfundible, coa forma de sepultura que lle deixaron- xa non bota auga porque a billa desapareceu. Tamén desapareceron as billas das outras dúas fontes; nos buratos espicharon uns paus para atoar a saída da auga, aínda que nunha delas a fuga é moi aparatosa e o chan está completamente encharcado.

Máis eivas: o perímetro da arboreda segue sen ningún peche de seguridade para evitar caídas polo terraplén, os restos da poda que se fixo nas árbores en xullo seguen tirados nun desnivel lateral. E que sucede cando hai residuos nun lugar? Que lixo chama a lixo. Agora, ademais das pólas secas, apareceron refugallos de obra.

Non parece que este espazo de lecer reciba o coidado que merece. Como outros espazos dos que a Comunidade de Montes se desentende: o patrimonio rupestre, as pistas, as canles de auga, e o Monte Pituco no seu conxunto, condenado -co seu beneplácito- a converter nun deserto de formigón o que por dereito está catalogado como un Espazo Natural.

Fonte situada na arboreda do Pituco, que antes estaba na área recreativa do monte (xullo 2013).

[Fonte, xullo de 2013]

Outra das fontes da arboreda, cunha fuga de auga.

Fuga de auga nunha das fontes da arboreda.

Outra fonte, inutilizada.

Tarugo de madeira que tapaba o burato da billa da fonte.

Verquido de cascallos de obra.

As pólas da poda das árbores feita no verán seguen tiradas no terraplén.


Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s

Categorías

%d bloggers like this: