DEFENDE O MONTE PITUCO (Pornedo)

Hoxe estivemos na escena do “delicto”, en Lourizán, vendo o regueiro de rodas que os desaprensivos ciscaron pola conducción da auga e contra o valado metálico que separa a pista de servizo da Variante. Uns veciños que pasaban por alí comentáronnos que o verquido ilegal leva unha semana nese lugar e que non é a primeira vez que se producen feitos similares no contorno. Na anterior ocasión, descubriuse quen fora o (ir)responsable, que foi obrigado a reparar a súa acción retirando o material que deixara tirado.

Mañá sairá na prensa local, debido a que un xornalista que consulta periodicamente este blog atopou o artigo de onte. Dende o outro lado do teléfono, transmitíanos o seu asombro -no sentido negativo da expresión- ante  a barbaridade que evidenciaban as imaxes. As de hoxe son, se cabe, máis impactantes porque os primeiros planos son coma unha labazada na cara de quen ten unha mínima sensibilidade e sente rabia e indignación ante estas e outras agresións contra o medio ambiente.