DEFENDE O MONTE PITUCO (Pornedo)

O verán pasado localizouse un verquido no lugar das Presas, por riba do lugar do Caeiro. Nunha curva da pista que discurre paralela á variante, do lado do monte, os autores desta infracción aproveitaron un terraplén para volcar caixas de cartón, plásticos, albaráns e documentos comerciais con datos de clientes, estruturas metálicas, rodas e outros refugallos. A Comunidade de Montes notificoulle este verquido ás autoridades e comentou a problemática na asemblea de agosto.

Con data do pasado 7 de xaneiro, a alcaldesa de Marín asinou un documento municipal no que se daba conta da denuncia da Policía Local contra a empresa Galigru, radicada na Ramalleira, Bértola, como responsable dese verquido “de lixo e residuos (documentación, filtros de aire, plásticos, caixas, cartón…)”. A concelleira de Medio Ambiente, Marián Sanmartín, foi designada instrutora deste expediente sancionador, cuxa cuantía oscilaría entre os 1.500 e os 3.000 euros.

Sen embargo, o feito de que esta empresa xa non estea operativa fai sospeitar que a multa sexa papel mollado. Malia todo, esta denuncia é a proba de que paga a pena protestar, rebelarse contra os desaprensivos que contaminan os montes e facer traballar a Administracións para que cumpran e fagan cumprir as normativas medioambientais.