DEFENDE O MONTE PITUCO (Pornedo)

Salto por enriba

do lume de San Xoán

pra que non me trabe

nin cobra nin can…

E prenderemos a cacharela, mollaremos o pan co prebe da sardiña, saltaremos as lapas unha, dúas, seis, nove veces… número máxico, e pediremos un desexo en cada chimpo:

o apoio necesario e incondicional da veciñanza,

a pericia para rabuñar en todas as portas posibles,

pacencia para sobrelevar as couces da oposición interesada e simple,

ilusión, tempo e recursos para mobilizarnos,

compromiso para seguir velando polo noso futuro,

unha clase política receptiva ás preocupacións da xente e con proxectos razoables,

uns xestores do monte honrados e responsables co aproveitamento sostible dos recursos forestais,

un patrimonio natural e arqueolóxico a disposición da sociedade

un Monte Pituco revalorizado, a salvo do formigón, da contaminación, da especulación.