Publicado por: MontePituco | 04/03/2014

QUINTILLÁN REPITE NA COMUNIDADE DE COMBARRO

Diario. 2 de marzo de 2014.

Velaquí a primeira entrevista de Claudio Quintillán no Diario de Pontevedra tras ser reelixido presidente da Comunidade de Montes de Rega dos Agros, en Combarro. Reproducimos a continuación algúns fragmentos das súas reflexións, por interesantes e por dignas de ter en conta no que respecta á defensa do territorio e do patrimonio natural e arqueolóxico, que tanto vimos reivindicando en DEFENDE O MONTE PITUCO.

Decidimos sustituir o eucalipto polo piñeiro. Iso xunto cunha repoboación que fixera o Estado en todo o Castrove, cando nos tocaran 40 hectáreas de piñeiro, permitiu ir encauzando cara a esta especie. Hoxe temos máis dun 60% de ocupación. Iso dá outra orientación. O piñeiral recibiu traballos de mellora con subvencións e aportacións da comunidade. Tamén temos parcelas de frondosa para crear mosaico e paisaxe, sobre todo ao estar nunha zona moi turística.

Pensamos en que o monte sirva para atraer visitantes. De aí que tamén abriramos dous miradoiros na etapa anterior e queiramos crear unha ruta na nova etapa, con dous máis. Van a distintas alturas sobre o nivel do mar para observar partes diferentes da ría. Grazas a estes dous miradoiros que xa hai, varios centos de persoas botaron máis tempo do que pensaban en Combarro. Foi iniciativa nosa, con fondos propios e de Agader, e é un atractivo máis para o Concello. Tamén é interesante o asunto do patrimonio cultural. Xa recuperamos zonas de interese, como foron a da Cuna da Moura, e temos localizados algúns petroglifos no monte e tamén pensamos arranxar eses espazos. O tema do patrimonio cultural ten moita importancia. En canto a toda esta actividade, economicamente, poderemos sostela grazas á produción forestal, porque non temos nin antenas nin parque eólicos nin nada diso para financiarnos. Pensamos en alternativas complementarias: por unha banda, xente interesada en gandeiría ecolóxica que, unha vez que vai medrando o piñeiro, poderase meter gando como porco celta ou vacún autóctono… Ademais, con iso podemos prever os incendios. O monte debe combinar actividade económica, ecolóxica e social.

Non todas as comunidades son así. Hai xente que non entende que haxa uns comuneiros que decidan sobre o monte, e moitas teñen mala fama, algunhas tamén incumpren, pero para iso hai unha lexislación e a propia Xunta debería controlar que non haxa desmáns. O monte veciñal é unha riqueza patrimonial.

Cando hai moitos cartos apúntanse comuneiros en masa, a ver se cae algo, se se reparte.

En Galicia hai 2.800 comunidades que representan a máis de 280.000 comuneiros. Delas, 400 poden estar ben xestionadas, e desas, 200 moi ben xestionadas. En toda Galicia. Quedan 2.400 que non actúan en condicións.

Temos máis de 30 voluntarios para subir cando faga bo tempo a podar, rarear e facer o que se poida.

O monte é moi sensible. Vento, noite, altas temperaturas, e calquera louco provoca un lume. Seguiremos confiando na colaboración veciñal e na persecución a esta actividade.

O monte é obxecto de todo tipo de verquidos, tamén é importante parte da paisaxe, sobre todo na costa máis turística. Os concellos deberían ternos en conta en consellos ou organismos consultivos para poder coordinarnos mellor.


Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair / Cambiar )

Twitter picture

Estás a comentar desde a túa conta de Twitter. Sair / Cambiar )

Facebook photo

Estás a comentar desde a túa conta de Facebook. Sair / Cambiar )

Google+ photo

Estás a comentar desde a túa conta de Google+. Sair / Cambiar )

Conectando a %s

Categorías

%d bloggers like this: