DEFENDE O MONTE PITUCO (Pornedo)

…Cada persoa ten ese lugar predilecto ao que acode a cotío para desconectar, cargar as “pilas”, evadirse, entreterse. O Monte Pituco é ese espazo máxico que moitos veciños de San Xulián, do centro de Marín ou mesmo da veciña Pontevedra veñen visitar para atoparse consigo mesmos e estreitar os seus lazos particulares coa natureza. E non porque haxa unha mancha nun mapa que condena este enclave a converterse nun polígono industrial que cercenaría a fauna, a flora, e o valor paisaxístico, ecolóxico e cultural da zona, imos renunciar a el. Máxime cando en DEFENDE O MONTE PITUCO consideramos que esa decisión non está baseada en criterios urbanísticos atinados, que se vulneran os principios de protección ambiental e arqueolóxica que posúe este monte, que só o capricho político, o interese electoralista e a codicia económica están detrás de semellante aberración.

Por iso cómpre reivindicarmos o que Federico de la Peña expón nunha reportaxe publicada no Diario de Pontevedra o pasado 12 de maio de 2013: a natureza como terapia. Que é das poucas cousas de balde que nos van quedando nesta vida.