DEFENDE O MONTE PITUCO (Pornedo)

Faro de Vigo, 18 de novembro de 2009: Suárez recuerda a Marín que la propuesta de MONTE PITUCO fue DESECHADA en 2000. Los técnicos consideran “inviable” un puerto seco ahí por el desnivel del terreno.

Xa perdemos conta das veces que se repetiu neste blogue a imaxe da noticia publicada no Faro de Vigo informando sobre o rexeitamento da Autoridade Portuaria á opción do Monte Pituco como hipotética ubicación para a plataforma loxística que demandan os responsables do Porto ao abeiro das pretensións das empresas máis poderosas radicadas nese recinto.

Que xurdan colectivos a prol do porto, como no seu día xurdiu unha plataforma pro-polígono, é unha decisión que merece respecto, sempre e cando as normas do “xogo” sexan as mesmas para toda a cidadanía, é dicir, conforme á lexislación, como non podía ser doutra maneira. Do contrario, en desigualdade de condicións, a lei que primaría sería a do máis forte en materia económica e/ou política. Mais os tempos dese rodillo implacable, en principio, forman parte do pasado; agora suponse que prevalece o Estado de Dereito, tanto para o que nos beneficia como para o que nos perxudica.

Apelar ao espírito literario de Fuenteovejuna é unha arma de dobre filo cando, en vez de asumir unha responsabilidade política ou administrativa con sentido común, se utiliza unha causa como látigo social. E así é como se chega a facer bandeira do lema “todo vale” con tal de conseguir un obxectivo que, se non se acadou polas boas, intentarase conseguir polas malas.