DEFENDE O MONTE PITUCO (Pornedo)

Timidamente, a choiva parece empezar a facer efectivo o famoso refrán que augura “en abril, augas mil”. Por desgraza, mentres o anticiclón non nos deu tregua, tiveron que arder moitos centos -mesmo milleiros- de hectáreas no pouco que levamos de ano. A Organización Galega de Montes Veciñais en Man Común volve cargar unha vez máis, tralos lumes que calcinaron unha parte das Fragas do Eume, contra a situación de abandono do medio rural. E critica a falta de compromiso da veciñanza no coidado dun monte ao que se lle dán as costas, que non se valora suficientemente, e cando se “valora” é acaso para tirarlle “diñeiro fácil” a base de consentir a súa destrucción para uns fins que, en absoluto, teñen que ver co concepto de monte “multifuncional e sostible” que esta Organización reivindica. Por riba, as políticas forestais dos últimos anos non contribuíron nada a prestixiar o monte como fonte de ingresos, nin como referente identitario. E así nos loce o pelo. Cómpre, pois, unha nova estratexia que aposte polo monte como motor de desenvolvemento, implicando a todos os ámbitos da sociedade na súa conservación.